سَـلـُوا قـَـلـَـمِي

أنا نـــــــازل..!!

2012-01-24T11:42:00.000-08:00

أنا نازل

عشان ليلي يبانله صبح

عشان لسه بداوي الجرح

ولسه شايف الأحلام..

بتتحقق

خلاص مفاضلش غير زقه

وصوت يعلى ولو مبحوح

واشوفنا زي ما كنا

بنفس الفرح فـ عيونا

ونفس الروح

هلال شايل صليب مجروح

صليب ماشي فـ ايديه شومه

عشان اخواته بيصلوا..

فيحميهم

عشان صوت الميدان واحد

مبيفرقش أساميهم

ولا بيعد ويفاصل

فانا نازل

***

أنا نازل

عشان لسه الأمل فيـّا

ببكره جديد

مش اصبح بكره والقاني..

فـ أمسي بَعيد

مش أما يتنبح صوتي

عشان حقي

الاقي صوتي مش طالع

يقف قدامه ميت مانع

واروح في حديد

ولما أطلع أتظاهر

يقولوا بلطجي وظاهر

أقرر أعتصم أسبوع

يقولوا أصله واد خاين

وكان جربوع

ولولا لقمة الخواجات

لكان هيجوع

تقولوا زي ما تقولوا

مانيش مخدوع

وصوتكم ليا مش واصل

أنا نازل

***

أنا نازل وبتعجب

من اللي ناوي يعملها..

يادوب حفله

وعاوز ظلم وفـ غفله

يحسسنا

بإن احنا عيال سافله

وديـّة غلطة المخلوع

مقدّرش اللي حاصل صح

وقفناله وعملنا الصح

فياللي عاوز الحفله

يا ريتك بس وحياتك

تجيبلي أماره للحفله

واخدنا من الميدان واحد

سايبنا مليونين واحد

واخدنا طفل بيغني

سايبنا شيخ بيتشاهد

وعندي مليونين شاهد

وألف شهيد

فانا نازل وعزمي حديد

هكمل ثورتي تاني

وهاحميها

عشان لسه الأمل فيها

ولسه الحلم بيناضل

فانا نازل

***

أنا نازل

لا يمكن تاني هتنازل

ده دم شهيد

وبعد الدم ايه فاضل؟؟

مفيش فاضل..

يسيب دمه

وشاب بتدفنه أمه

ومبتبكيش

بتضحك ضحكه من جوه

وتحلف أيمانات ياما

تقولك عاش

مراحش بلاش

ولو تحت التراب جسده

فروحه باقيه ويانا

مفارقتناش

ما بين الصبح والعتمه

تشاغل فيا وتغازل

تقولي مـُـتّ لاجل تعيش

فاوعاك عني تتنازل

فانا نازل

***

المشير المبارك..!!

2011-11-23T13:13:00.000-08:00

التاريخ يعيد نفسه ، ميدان مشتعل ، قتلى وجرحى ، قنابل غاز ورصاص مطاطي وأحيانا حي ، مؤيدون ومعارضون ، تخوين هنا واتهام بالعمالة هناك ، وشعب حائر أو مضلل ، جله لبساطته وجهله بعد تجهيله لا يدرك ما يحدث ولا يجيد النقد ولا يستطيع الحكم على الحدث ، وبالنهاية خطاب سياسي باهت من أصحاب منصب مغيبين عن الواقع ، في برج عاجي معزول ، يلعبون كعادتهم على مشاعر الناس واستعطافهم وتضليلهم وعلى عامل الوقت أيضا.

قضيت أمس - يوم البيان - بالمستشفى ، طبيبا ولست مريضا :)، وكان اليوم هادئا كالشتاء ، على عكس سخونة الأحداث ، في الحقيقة لم أنتظر خطاب المشير بشغف أو بفارغ الصبر كما كنت أفعل مع خطابات مبارك ، توقعت خطابا مخيبا للآمال ، باهتا مملا ، به كثير من الإنشاء قليل من الحلول ، وقد حدث ، استمعنا إلى خطاب مباركي آخر ، لدرجة أني شككت أن كاتب الخطاب هو ذاته كاتب خطابات مبارك الثلاثه !!

التلفزيون المصري منذ الظهيره يقول :"بعد قليل" ، ننتظر وننتظر ، نقوم ونقعد ، نصحو وننام ، ومازال القليل لم يأت بعد ، تماما كخطابات مبارك ، ربما التأخير هنا لم يكن "غلاسه" ، ولا من باب التشويق ، ربما كان هو وقت المونتاج - الفاشل - للخطاب.

أسف المشير - تماما كأسف مبارك - لدم الضحايا (وليس الشهداء) ، وهو أسف غير مقبول ومبتذل ومستفز ، فليس من المعقول أن تكون المسئول الأول عن ما يحدث ، ثم تخرج بكل بساطه لتتأسف ، ماذا يفعل الناس بأسفك وبينما هم يسمعونك يموت أبناؤهم على الأرض ، ماذا يفعلون بأسفك وأنت تقول بكل تبجح أن الداخليه تقوم بعملها وأنك تدعمها ، يعني تتأسف للمقتول وتدعم قاتله ، لم يكن مطلوبا منك التأسف ، لست رجلا حقوقيا يجيد الأسف أو يمتهنه ، واجبك هنا ليس التأسف ، بل وضع حد لما يحدث.

"أنا قررت" ، أكثر جمل الخطاب استفزازا ، فيها كم لا يستهان به من العنجهية والإستعلاء ، ثم من أنت حتى تقرر - وحدك - أي قرار ، أنت يا سيادة المشير على رأس مجلس يدير شئون البلاد ، بناء على شرعية نحن أعطيناها لكم ، لست رئيسا ولا يصح أن تتكلم كرئيس ، كان من الأولى أن تقول " لقد قرر المجلس" هذا هو الطبيعي والمنطقي والمقبول ، ما فهمته أنا من الجملة أنك تبعث برسالة أنك أنت الآمر الناهي ، ربما الأمر كذلك ،لأن المجلس هو مجلس عسكري بحت ، فإن هناك خطوطا حمراء ووقوفا لازما عند الرتب والأقدميات ، فليطعك المجلس إذا ، ولتطعك الحكومة كما تشاء ، لكن لا تطلب ممن أعطاك الشرعية أن يكونوا مسلوبي الإرادة كأنه مجندون لديك.

دور القوات المسلحة دور محوري لا ينكره عاقل منصف ، وجهودها فوق رؤوسنا ، ولا يتصور أن يسب القوات المسلحه وأن يشوه صورتها إلا عدو لمصر ، تحدث المشير عن ذلك ، وأسف أسفا شديدا - كأسف مبارك - مما يتعرض له الجيش من نقد وسباب ، هنا تضليل كبير ، وتلاعب بالكلمات ، وسياسة خلط حمقاء ، لم نسمع أحدا يسب الجيش أو ينكر دوره ، ولا يصح ذلك من الأساس ، إن كل ما يقال هو نقد لاذع لقيادة سياسية فاشله متمثله - للأسف - في المجلس الأعلى للقوات المسلحه ، وليس المجلس هو الجيش ، وليس الجيش هو المجلس ، نقطة قتلت بحثا وإيضاحا ، ولم يفهمها المشير بعد.

قرر المشير - على حد قوله - قبول استقالة الوزاره ، مع بقائها في مكانها كحكومة تسيير أعمال ، ماذا كانت إذا قبل الاستقاله؟!!! كانت حكومة تصريف أعمال ، طيب وبعد الاستقاله ؟!! حكومة تسيير أعمال!! ما هذا السخف؟!! ما الفائدة التي عادت علينا إذا من قبول الاستقاله ؟!! ولماذا لم يتم تحديد رئيس الوزراء الجديد ؟؟ ولماذا لم يتم تحديد صلاحيات الوزارة الجديده ؟؟ فوزارة جديده بنفس الصلاحيات القديمة هو العبث بعينه ، على الأقل لماذا لم يتم تحديد جدول زمني أو موعد لتشكيل حكومه جديده ؟!! يعني تم قبول الاستقاله ولكنها باقية إلى أن يأذن السيد المشير لها بالرحيل في وقت هو في علم الغيب لا يعلمه إلا الله ، حتى مبارك عندما أقال حكومة نظيف شكل حكومة أخرى ، مبارك نفسه لم يتعلل بالظروف والأحوال والتوقيت والجو ، لا بديل عن حكومة إنقاذ وطني بصلاحيات تامه كامله لقيادة المرحلة الانتقاليه دون وصايه من المجلس الموقر ، فقد ثبت بالدليل القاطع فشل المجلس سياسيا ، ولا لوم عليهم فجل ما يفهمه هؤلاء هو العسكرية ، أن ترمي بهم في ملعب السياسه ، كأن تأتي بأبو تريكه لإجراء عملية قلب مفتوح ، سيموت المريض إذا ، أو أن تأتي بالدكتور مجدي يعقوب ليلعب بصفوف المنتخب ، حتما لن يحرز هدفا ، يجب الاعتراف أن لكل منا دوره الذي يجيده ويحسنه ، ولو قرر أن يلعب دورا آخر لفشل فشلا ذريعا ، الأمر يحتاج إلى بعض التنازل وتقديم مصلحة مصر على الجميع.

أخيرا ، بصيص أمل ، آثرت أن أؤمن به لئلا أخرج من الخطاب بلا شيء ، انتخبات رئاسيه منتصف 2012 ، ربما هو مجرد وعد غير مدعوم بأي ضمانات أو خطه أو خارطة طريق ، كأن تقول لابنك الذي يبكي ليلا من أجل الشيكولاته ، نم وسأحضرها لك غدا ، وغالبا تنسى وعدك ، تماما كما قالوا من قبل سنسلم السلطه خلال ستة أشهر ، لكنه بالنهاية بصيص أمل ، لا يجب أن نيأس ، فلا يأس مع الحياة ولا حياة مع اليأس ، ولو يأس أصحاب التحرير لماتت الثورة ، ولماتت معها مصر.

حفظ الله مصر ، وحفظ شعبها ، وهداهم سبلهم

اللهم آمين

العسكري الوطني الديموقراطي !!

2011-11-20T08:40:00.000-08:00

مش عارف أكتب عربي والا عامي والا افرنجي ، المهم إني هاتكلم وخلاص وزي ما الكلام يطلع هاكتبه

(بداية اسمع السيد اللواء محسن الفنجري في مداخلتين أمس مع الحياه و سي بي سي )

مع الحياه

مع سي بي سي

"الشعب والجيش إيد واحده"

رددناها حتى ملتها ألسنتنا ، وبالطبع لا يصلح بحال من الأحوال أن لا يكون الشعب والجيش يد واحده ، وإلا كيف تستقر الأمور ، وكيف نعبر تلك المرحلة الحرجه التي يعلم الله وحده كيف تنتهي وإلى أين ستؤول ، لا أحد يمكن أن يكره الجيش أو يرميه بالتهم أيا كانت الأحوال ، فالجيش هو أخي وأخيك وأنا وأنت ، قوامه الرئيسي من المجندين وضباط الإحتياط ، ليسوا مرتزقه ، وهذا هو سر قوة هذا الجيش على مر العصور.

يعترض البعض على الفصل بين الجيش كمؤسسه عسكريه ، والمجلس العسكري كحاكم سياسي - مؤقت - للبلاد ، وهو فصل لا بد منه ، لأننا لولا هذا الفصل لما استطعنا أن ننتقد المجلس في أي من قراراته ، وإلا كنا ننتقد الجيش ، وتلك مصيبة كبرى ، إذا الفصل حتمي.

مليونية الجمعه ، طبعا وحتما ويقينا أتفق معها ، كما اتفق معها الملايين ، وتعالوا لا ندفن رؤوسنا في الرمل ، وكلما حدث شيء لا يعجبنا إما أن ننسبه إلى فلول ، أو إلى إسلاميين ، أو إلى بلطجيه ، أصر التلفزيون المصري - الفاشل - على أن الموجودين بالميدان يوم الجمعه جلهم من الإسلاميين ، ربما عددا نعم ، لكن أليس التضامن ولو بفرد واحد يعني المشاركه ؟؟ إذا فإن كل من أعلن رفضه للوثيقة وتأييده للمليونيه قد حضر ولو لم يحضر !! ثم إن بعض الأحزاب التي لم تشارك في المليونيه - كالوفد - تعترض على بعض بنود الوثيقه ، ثم بعد ذلك يدعي اللواء الفنجري أن هؤلاء لشرذمة قليلون وانهم لنا لغائظون وأن المؤيدين للوثيقة هم بالبيوت الآن يشاهدون التلفاز ، يعني أن الوثيقة معها الملايين ، كملايين القذافي تماما !!

هنا نقطة خطيره ، كيف للمجلس الذي من المفترض أنه يقود البلاد إلى مرحلة مزدهرة من الديموقراطيه ، وإلى بر الأمان - على حد تعبير اللواء الفنجري - كيف له أن ينكر أصوات الملايين ، وأن يقول - كما قال مبارك من قبل - أن الشعب المصري معه ومع الوثيقه ولكنه قابع في داره يشاهد التلفاز من على "الكنبه" ، وأن يقول - كما قال عمر سليمان من قبل - أن من بالشارع الآن هم من البلطجيه و أصحاب الأجندات ؟؟ الأمر خطير يا سيادة اللواء ، بداية الحل للمشكله هو الاعتراف بها ، وليس انكارها كأن لم تكن.

مرت المليونيه بسلام - أو هكذا اعتقدنا - ثم قرر البعض أن يستمروا بالاعتصام إلى أن يتحقق المطلب ، هو حقهم قانونا ولا ينكره أحد ، ولا يحق لك يا سيادة اللواء إخلاء الميدان بالقوه ، لمجرد أن اعتصامهم يعكر مزاج المجلس الموقر ، ثم تخرج لتلخص المسأله بأنهم بعض مصابي الثورة ولهم بعض المطالب وتم تلبيتها، وأن المتبقين هم من أصحاب الأجندات ومن البلطجيه ، يا حلاوه يا ولاد ، يا سيدي الفاضل هم يدافعون هنا عن موقف سياسي ومبدأ ، يدافعون عن ثورتهم ضد وثيقة السلمي المستبده ، الفوق دستوريه ، ده حتى اسمها عيب والله ، وليسوا بعض الجياع ستسكتهم بمكافأه أو راتب شهري ، لا أدري إذا كنت تدرك المشكله وتنكرها - وتلك مصيبه - أم أنك لا تدرك المشكلة من الأساس - فالمصيبة أعظم

ثم أيا كان سبب الإعتصام ، هل من حق الداخليه أن تفضه بالقوه ، جعلتمونا بالأمس نشاهد يوما من أيام الثوره ، ولا أدري كيف تنام لكم عيون وأنتم ترون هذا يحدث ولا تتحركون لإيجاد حل حقيقي وجذري ، وليس مسكن موضعي يزول أثره سريعا ، أو لا يكون له أثر من الأساس ، اعترفوا بخطأكم ، قولوا أخطأنا ، ولنعمل سويا على إصلاح ما كسر قبل أن يفوت الأوان ولا ينفع الندم ، يا حضرات المحترمين ، طالما أنتم تجيدون التعامل بالقوة هكذا ، لماذا إذا لم تستعملوها مع أصحاب المطالبات الفئويه ، ومن قطعوا الطرق ، ومن أوقفوا القطارات ، ومن كبدونا خسائر بالمليارات وأوقفوا حقا مسيرة تقدمنا؟؟؟ الأمر يحتاج إلى تفسير مقنع قبل أن ينفجر الوضع أكثر.

السيد عصام شرف رئيس الوزراء ، أكن له احتراما كشخص محترم ومؤدب وابن حلال ، (يعني ممكن أعتبره زي أبويا ، أتمنى أتعرف عليه ، يشرفني أناسب واحد زيه ) لكن ليس أكثر من ذلك ، الرجل ثبت بالدليل القاطع وبالأحداث المتواليه ، ضعفه الشديد ، وفشله المذري في إدارة الأزمات ، ربما هو رئيس وزراء كرتوني ، وأن الدفة بيد المجلس العسكري وحده ، إذا فليقدم استقالته ، فليعف نفسه من كل هذا النقد واللوم وربما قلة القيمه ، الرجل في أوج اشتعال الأزمه يخرج ليحدث الناس على تويتر ،خلصنا من حكومه ذكيه ، طلعلنا رئيس وزراء ديجيتال!! عموما ماشي أهي وسيلة اتصال برضه ، والعيال اللي في الميدان دي عيال سيس مينفعش معاهم غير كده ، طيب ماذا قال؟؟؟ قال - خير اللهم اجعله خير - أناشد المواطنين العوده إلى منازلهم والحفاظ على مكتسبات الثوره ، يا عم فوق وارحمنا ، مكتسبات إيه ونيلة إيه ، الثوره بتضيع وبنرجع للقديم تاني وتقولي مكتسبات ، أنا بأى هاقتبس حاجه من المكتسبات وأقولك "عصام شرف ، عفوا لقد نفذ رصيدكم!!"

الداخليه ، عود أحمد ، طبعا حبيب بك العادلي معاكم ع التلفون ، والا ليه حبيب العادلي ، ما ربنا يخليلكم منصور بك العسوي ، شالوا ألدو وحطوا شاهين ، برضه ظلمه ومش نافعين ، نفس الطريقه الخايبه ، ده حتى مفيش تجديد من بتاع ميلودي تتحدى الملل ، ومازال الغباء المتراكم من تلاتين سنه هو اللي بيحرككم ، يعني بعد كل اللي حصل في مصر وبره مصر ، واللي أثبت بالدليل القاطع لأي واحد عنده بقايا مخ إن العنف معادش بينفع ، وان الناس جسمها نحس ومبقتش بتخاف من الضرب ، وان صاحب المبدأ ممكن يموت عشانه مش هيخاف يعني من قنابل الغاز ويروح ، بعد كل ذلك راجعين للعنف تاني ، جاتكم خيبه .

التلفزيون المصري ، حلاوتك وانت بتتدلع ، طب مهو لازم يتدلع ، طول ما فيه واحد من المجلس العسكري الموقر قاعدلهم ، ثم أصلا مهو اللي كانوا بيطبلوا لحسني مبارك ونظامه ، هما هما اللي بيطبلوا دلوقتي للمجلس ، مفيش حاجه اتغيرت ، والمذيعين والمعدين هما هما وحتى الإداره مش عارفه تعمل حاجه في ظل وجود الوصي أبو بدله ميري ، ولسه برضه بيناقضوا نفسهم ويناقضوا الصور اللي هما بيعرضوها ، أصل يموت الطبال وصوابعه بتلعب ، أنا مشفتش غباء كده ، يعني اتفضحوا فضيحة الحرامي في المولد ، ومفيش فايده ، نفس الكدب والتدليس والتطبيل ويا عين يا ليل ، أنا أصلا تركت العوض فيهم من زمان وبطلت أتفرج عليهم .

المحصله من كل الفضفضه اللي فوق دي إني شايف إن نظام مبارك لسه زي ما هو ، وإن مبارك نفسه قاعد دلوقتي هو وعياله بيضحكوا علينا ويطلعوا لسانهم للثوره واللي عملوها ،مهو عصرهم لسه موجود ومسيطر ، الناس تطلب حاجه يعملوا عكسها ، يتنبح صوت الناس بالمطالب ويغلبوا ويتعبوا من المناقشات والحوارات والاجتماعات والجماعه اللي فوق ودن من طين وودن من عجين ، يعملوا مليونيه واعتصام عشان ياللي مشفتش شوف وياللي مسمعتش إسمع ، يقولك دول بلطجيه وأصحاب أجندات ، إنما الناس المحترمه نايمه ع الكنبه بتتفرج ع التلفزيون ، ويضربوهم ويسحلوهم وبعدين ياخدوهم يعملولهم محاضر اعتداء على الشرطه واتلاف ممتلكات ، قانون الطوارئ لسه موجود ، طلعوا شوية معتقلين وخدوا قصادهم شوية معتقلين وكأنك يا ابو زيد ما غزيت ، الوضع محزن

اللهم يا حنان يا منان ، أرنا في كل من يريد لمصر سوءا عجائب قدرتك ، واجعل كيده في نحره ، واجعل تدبيره تدميره ، وانصرنا يا ربنا على أعدائنا ، من علمنا منهم ومن لم نعلم ، واجعل مصرنا بلدا آمنا سخاء رخاء وسائر بلاد المسلمين ،
وربنا يدي كل واحد على قد نيته لا أكتر ولا أقل ، اللهم آمين

الباب موارب بالأمل

2011-10-01T16:58:00.000-07:00

بحبك

بحبك والغرام باين

فـ عيني قبل ما اتكلم

ورغم ان الهوى ظالم

وكله جروح

فانا راضي اني اعيش مجروح

وراضي إني أتألم

بحبك

مش قرار مني

ولا صدفه

ولا شفتك فحبيتك

و لا خيرك مغرقني

وصنتيني فوديتك

ولا كنت أنا جاهل

وقمت لحبك اتعلم

ولا في الحب أنا معلم

انا أصلا منيش عارف

ولا فاكر

بقيتي انتي حبيبتي ازاي

باينه أمر متحتم

أعيش بيكي

وحبك نبض جوايا

معشش في خلايايا

حروفه بين حروف إسمي

تجاعيده على جبيني

مغزول مع الجينات

منظوم ما بين الدم

عايش ف ضي العين

وبين خيوط الحلم

*****

بحبك

عمري أو يمكن

قبل أنا ما اتولد حتى

وحالك والله حيرني

وشتتني لميت حته

ما بين شمسك وبين ضلك

وبين واحد صحيح حبك

وواحد أصبحت غايته

يدنس فيكي ويضلك

وما بين عمرك اللي راح

وكله جراح

وبين فرحك ويوم عزك

وصبحك جاي وفاضلك

وبين عتمه بخاف منها

ونور باين في مد الشوف

ينادي واسمعه عالي

خلاص يا ولادي مبقاش خوف

مبقاش فيكي أي خسيس

يبيعك بخسه ويذلك

*****

قالوا البيبان اتقفلت

وصبحتي مخنوقه

م الحبس والعتمه

يا خلق هوه

هل فيه بيبان؟؟

هتحرم الشمس الشروق

أو تحرم البدر انه يفضل عالي فوق

والباب موارب بالأمل

الباب موارب بالمحبه والاشتياق

قالوا...وكدبوا...

إن اللقا...

بيطفي نار المشتاقين

دول طلعوا أكبر كدابين

إيه يعمل الشوق ف اللقا

والا اللقا في الشوق

سكران بحبك أنا

مش ناوي إني أفوق

سكران بحبك

بس فايق للي جاي

علشان أخلي

فجر بكره ملوهش زي

وحياتنا تضحكلنا

وتتعدل وتروق

*****

كلنا بنقول "بحبك"

كل يوم بنقول "بحبك"

خلصنا في الحب الحروف

ضيعنا فيه كل اللي فات

هو الهوى يا اخوانا أصبح بالكلام ؟؟؟

هو اللي يهوى

يسرق النور من حبيبه؟؟

ميكونش ستره ويبقى عيبه؟؟

طب اللي فات

كان عمر ميت بالسكات

أو بالكلام اللي ما ينفع أو يضر

يبقى اللي جاي

مش عمر تاني يضيع هدر

مش صوت حبيس

قوم لما يعلى

يروح يهد الأهرمات

يقلب حياتنا كلها

وينادي فينا بالشتات

يبقى اللي جاي

لازم يكون صوت الضمير

والعقل يرسم كل خير

والخطوه ترفع أرضنا

فوق السما

زي الطيور

والإيد بتبني مش تهد

وتشيل بلدنا من هنا

للعالم الأول صحيح

العالم اللي ملوهش زي

وملوهش قد

وتحقق الحلم اللي كان

آسر عقولنا من زمان

وملوهش حد

ثوار .. ولكن ظرفاء!

2011-06-15T03:48:00.000-07:00

موضوعي المشارك في مسابقة عالم الإبداع

ثوار .. ولكن ظرفاء!

إن أعجبك الموضوع فلا تبخل بتعليق

أيضا الموضوعات المشاركه شيقه جدا

سيفوتك الكثير لو لم تقرأها

وإليك القائمه

قائمة الموضوعات المشاركه بالمسابقه

دمتم بخير :)

حاجات في مصر

2011-05-18T11:03:00.000-07:00

مش عارف أبتدي منين ، حاسس إن دماغي وارمه من الحاله الغريبه اللي البلد بتمر بيها ، المهم ، أبتدي من إضراب الأطباء على اعتبار إني واحد من الأطباء ، بداية أنا كنت - أيون كنت فعل ماضي - معترض بشده على توقيت الإضراب - التوقيت بس - على أساس ظروف البلد والعيشه والكساد وكده ، وكنت بتخانق مع اصحابي واقولهم عيب عليكم تقفوا دلوقتي وتحطوا العقده في المنشار ، هي الحكومه هتجيبلنا فلوس منين ؟! مش هنموت يعني لو استنينا كمان سنه ، م احنا مكانش فيه أمل في أي تغيير أو تقدم لو الثوره محصلتش ، نستنى شويه ، ده كان رأيي لحد أما قعدت مع واحد قريبي شغال عسكري - مش أمين شرطه ولا ظابط - في شرطة اسماعيليه ، وابتدى يحكيلي ، بعد الثوره ، يعني بعد ما ضربونا بالنار ، مرتبهم زاد الضعف ، طب يعني ده كلام والا اتطبق فعلا؟؟؟ قالي إحنا عملنا مظاهره واحده ، المرتب زاد بعدها على طول ، طيب يا ريتها جت ع المرتب ، البدلات ، مولد النبي تمانين جنيه ، عيد عمال مائتين وعشرين جنيه ، وهكذا ، على حد تعبيره ، ماسورة فلوس ضربت في الوزاره وكل شويه تصب علينا ، ومفيش شغل ، بقوله يعني إيه مفيش شغل ، قالي طول النهار قاعدين ، اللي يتخانق يتخانق ، واللي يبلطج يبلطج ، ولا حد بيقولنا اعملوا حاجه!!!! في واد عندنا في البلد سرق الوحده الصحيه ، واتبلغ عنه واتعرف انه هو واتعمله ضبط وإحضار ، المأمور جاي يقوله : "ممكن يا ابني تيجي معايا؟!!" قاله : "لو وزير الداخليه بنفسه جه مش هاروح معاه؟" سابه ومشي ، عشنا وشفنا الظابط بيستأذن الحرامي عشان يقبض عليه...وعجبي

الشاهد من الكلام ، إن اللي أثناء الثوره وقف ضدها ، واللي بعد الثوره برضه واقف ضدها بإنه سايب البلد في حالة فوضى وانفلات أمني مرتبه بيزيد وبياخد حوافز وبدلات ، يبقى من باب أولى ، اللي كانوا أثناء الثوره مبيناموش ، وبعد الثوره برضه طلعان عينهم (اللي عاوز يتأكد يتعب نفسه شويه وينزل أي مستشفى حكومي يشوف الدكتور بيتعمل فيه إيه) ، من باب أولى بأى إن احنا كمان ناخد حقنا ، مهو يا كنت تقول مفيش للكل ، يا إما طالما هتدي حد تدي الكل ، فيه ناس بتقول ده هما زودوا الداخليه عشان يرجعوا يشتغلوا وكده ، بقول والله ده شغله ، والمفروض إنه ينزل غصب عنه حتى لو المرتب مزادش ، ثم إنه بعد ما زاد لا شفناهم نزلوا الشارع ولا نيله ، نريد المساواه ، والعدل ليس إلا..

تعيين السيد نبيل العربي أمينا عاما لجامعة الدول العربيه ، مبسوط وزعلان ومتفائل..

مبسوط ان المنصب مضاعش من مصر ، أصل كانت تبقى وحشه بصراحه إن أول أمانه لجامعة الدول العربيه بعد الثوره تبقى لبلد تانيه ، وكمان مبسوط إن مصطفى الفقي مخادش المنصب ، برضه كانت هتبقى خيبه تقيله ، زهقنا من الوجوه القديمه الكالحه التي لم ولن تقدم جديدا.

وزعلان على وزارة الخارجيه ، من زمان محسيناش إن مصر ليها هيبه ووزن ، من زمان محسيناش إن احنا غايظين اسرائيل أوي وانهم مش عارفين يناموا بسببنا ، ومن زمان مشفناش كم الإحترام الرهيب ده في عيون كل العرب لينا كمصريين.

ومتفائل بإن مصر أكيد أكيد فيها نبيل العربي تاني وتالت ورابع وعاشر ، واللي جاب لنا نبيل العربي ممكن يجيبلنا زيه إن شاء الله ، لكن مش هيهدالي بال غير لما أشوف مين هيمسك مكانه ، وهل فعلا زي ما بعض الناس بتقول نبيل العربي اتشال بأوامر عليا من أمريكا ( مش راضيه تدخل دماغي) والا الحكايه جت عرضيه كده زي ما الإعلام بيقول ، الأيام اللي جايه هتبين..

المساجد ، بيفكروا يخلوا كل المساجد تابعه للأوقاف ، يعني من الآخر مش عاوزين أي جماعه إسلاميه تسيطر على أي مسجد وإن كل المساجد تكون تحت سيطرة البلد ، مع اللي بيحصل في البلد هي خطوه كويسه ، لكن مش وقتها خالص ، لعدة أسباب أهمها هتعمل مشاكل إحنا في غنى عنها دلوقتي ، الجماعات الإسلاميه دلوقتي حاسه بالقوه ، ومش هتيجي تاخد منها المساجد وتقولك متشكرين يعني ، وكمان خلينا نعترف إن معظم خطباء الأوقاف لا يصلحوا للخطابه بحال من الأحوال ، بل إن المشهور عنهم في كل مصر إنهم بيطلعوا يقولوا أي كلمتين ملهمش أي لازمه تأدية أوامر وخلاص ، إنت الأول جهز خطباء محترمين ، يعرفوا ينافسوا بجد الخطباء العمالقه بتوع الجماعات الإسلاميه ، وبعدين خد المساجد عشان اللي يتكلم ساعتها نحط صباعنا في عينه ، ونقوله طالما خطيب الأوقاف فقيه في دينه وخطيب محترم فنحن لا نحتاج إلى جماعات إسلاميه تعلمنا دينا لأن الإسلام دين أمه واحده وليس دين جماعات.

لو مبارك اتنازل عن كل فلوسه ، اللي نعرفها واللي منعرفهاش ، ممكن نسامحه ؟؟، فيه ناس بتقول يا عم ناخد الفلوس ونسيبه ، هو احنا يعني هيجيلنا إيه من حبسه ، أقولك هيجيلنا إيه ، أولا ، عشان تعرف تحكم مكان لاز م يبقى فيه قانون ، ويبقى فيه عقاب للمجرم ، وإلا بأى هتبقى هيصه واللي عاوز يسرق يسرق ويقول ماتمسكتش يبقى مصلحه ، ولو اتمسكت يبقوا ياخدوا الفلوس ويسيبوني ويا دار ما دخلك شر ، ثانيا بأى وده الأهم ، هي مشكلتنا مع مبارك كانت مشكلة فلوس؟؟؟؟ طبعا لأ ومليون لأ ، المشكلة مشكلة إفساد بلد بحالها ، وإذلال شعب بكامله ، بيتهيألي مفيش أي فلوس تعوض أم ابنها انضرب بالنار في المظاهرات ، ولا فيه فلوس تعوض واحد مراته اتهتك عرضها قدامه في أمن الدوله ، ولا فيه فلوس تعوض واحد كرامته اتداست وهو بينضرب من ظابط أصغر من ابنه ، ولا فيه فلوس تعوضنا عن الذل اللي كنا عايشينه ، والمراره اللي كنا حاسينها واحنا كأننا عايشين في بلد مهياش بلدنا ، بالنسبه لي مش هينفع اسامحه أبدا ، ولا هينفع أوافق على إنه يدفع عشان يخلع..

حاجه كمان ، أنا شايف إن إثارة النقطه دي دلوقتي مجرد خدعه كبيره ، عشان يعمل انقسام في الشارع أكتر ما هو منقسم ، نوع من إثارة الفتنه برضه ، وفعلا الشارع انشغل بالموضوع ، وفعلا انقسم نصين نص مؤيد ونص معارض ، رغم إن الموضوع لسه في طور الإشاعات ، ومش مهم نشغل نفسنا بيه دلوقتي ، ولا نختلف حوله...

ربنا يصلح حال البلد ، ويخلصها من كل واحد عاوز يخربها ويفسدها ، قولوا آمين :)

اللي بـيـنـّـا يا مصر

2011-03-07T17:49:00.000-08:00

اللي بينـّـا يا مصر

مش حلم عمري اللي اتسرق

في حماكي يا أم البشر

ولا شعر شاب قبل الصبا

علشان قاسيت البهدله

والمرمطه والعكننه والدلدله

وشفت العبر

ولا عمر فات

ماعرفش حتى فات في إيه

ولا أب مات

من غير ما تبكي ف يوم عليه

ولا شاب عاش

يرمي حياته في الخطر

علشان يصونك

يفدي بعمره فرحتك

ضحكة عيونك

نفسه يا مصر يطلعك

فوق في السما

نفسه الكرامه تنتصر

***

اللي بينـّـا مش أنا

والفرح مره في السنه

ولا ضهر عمره ما انحنى

صممتي إنه ينكسر

ولا تار أخويا اللي اتقتل

على مفرقك

ولا صوت غنايا اللي اتنبح

وانا باعشقك

ولا طول بكايا والسهر

***

اللي بينـّـا يا مصر

مش شعب عاش

ميت في حبك واتحسر

شافك بعينه

بكر طاهره بتغتصب

وحلمه إنه يحررك

من خوفه ولا مره قدر

***

اللي بينـّـا يا مصر

مش غربه في بلاد الجيران

ولا غلب ماعرف ملته

مكتوب علينا من زمان

ولا نور جبيني اللي انطفى

ولا بحر علمي اللي اتنفى

ولا شاب م الظلم انتحر

ولا طفل أول صرخته

ضايق جنابه بطلته

وشال الملامه وافتقر

اللي بينــّـا مش ملامه

و حبة الناس اللمامه

صاحب الفخامه..

والرياده..

والزعامه..

والرخامه..

المتين المعتبر

مش هما دول أهلك..

فـــــــــشـــــــــــر

فشر اللي قال..

إنك ضعيفه..

أو مهانه..

أو جبانه..

أو بعتي ابنك بالرخيص

فشر اللي قالك

كتر أهلك

فقر طافح..وانتشر

دول حصن ليكي م العدا

هما حماكي والفدا

وصمام أمانك م الخطر

***

من صغري وبقولك بحبك

رغم ما فيكي بحبك

حبي ده أصلا قدر

علشان يا مصر اللي ما بينــّـا

مش مصالح

مش بيت وأرض

و رحرحه وسكة سفر

ولا سهره ع النيل في الهوا

وضي القمر

ولا قصر عالي في السما

بيه افتخر

ولا شغل قيمه

و أجر باخده

ع الفكاكه والفكاهه والسمر

***

اللي بينــّـا يا مصر حب

مش قد عمري

ولا الحياه

ولا حد يوصل منتهاه

مش م اللي في قلوب البشر

ولا قد إنه يتوصف..

بكلام غرام

من اللي في الدنيا انتشر

***

ثوره إلا ربع..!!!

2011-02-25T12:09:00.000-08:00

كان أحد أساتذتي يقول :"المصري بيموت في الفصال ، يعني لو واحد وقف في الشارع يوزع أي حاجه ، هتلاقي واحد جاي يقوله : بكام ده يا عم؟؟ هيرد : ببلاش॥ هتلاقيه بيقوله : مش ببلاش إلا ربع والنبي؟!!!" ، يبدو حقا أن الفصال عادة أصيلة في الشعب المصري ، حتى عندما ثرنا ، خرج علينا من يفاصل في الثوره ، طيب ماذا لو وعد بألا يترشح؟؟ طيب لو لم يرشح إبنه؟؟ ماذا لو سلم صلاحياته لنائب؟؟؟ ولما لم يفلح كل ذلك تنحى - أو خلع - ثم دخلنا في مرحلة أخرى من الفصال (اللي يطلع الروح).

عادة الثورات أنها توجد حلولا جذرية فورية قاطعة لكل ما قامت الثورة لأجله ، هي ثورة وليست تظاهره ، هي سيل وإعصار يجتث كل فاسد من جذوره ، وليست محض أمطار يحتمي منها الفاسد في قصوره..

أحترم القوات المسلحة بشده ، وأثق بهم كثيرا ، لكن لا تعجبني سياسة "التنقيط" التي يتعاملون بها ، في الجزائر التي لم تثر مثلنا ، ولم تسقط نظاما ، رفعوا حالة الطوارئ ، وعندنا ما زلنا مهددين من الفاسدين في وزارة الداخليه ليتحكموا بنا بذلك المدعو قانون الطوارئ॥!! لست أفتري على أحد ، شاهد مدير أمن دمنهور ماذا يقول!!!

الفريق أحمد شفيق - مع احترامي - ليس هو الوجه الذي يصلح للمرحله الحاليه ، أنا لا أشكك في كفاءة الرجل أو وطنيته أو..أو.... ، لنقل أن الرجل هدية ، لكننا لا نريد أي أحد من ريحة حسني مبارك ، رحل مبارك فليأخذ هداياه معه إذا ، ويكفي الشعب المصري ليفقد الثقه في الرجل أن حسني هو من أتى به ، ثم إذا نظرنا للواقع ، فالرجل إلى الآن يتخبط ، لم يقدم جديدا ، لم يفعل خطوة واحدة تجعلنا نقول "الراجل ده شكله كويس" ، ثم إنه لم يعرف كيف "يسايس" المصريين ، فبينما الناس مختلفون حوله يظهر وخلفه صوره كبيره لمبارك ، ربما هو لا يفهم المصريين جيدا ، هو يحب مبارك " هو حر" ، لكن هو الآن رئيس وزراء جمهورية مصر العربيه التي خلعت مبارك ، يا سيادة الفريق قدم استقالتك ومازال لك عندنا بعض الإحترام.

الأخ وزير الداخليه ، أبهرنا في الحقيقة بكلام ولا أروع ، الداخليه بريئه من كل ما نسب إليها ، هي كذئب ابن يعقوب ، افترينا عليها ، وصبغنا ثيابنا دوكو أحمر وادعينا أنها الفاعله ، يا سيادة الوزير لا بد أن تعي أننا أصبحنا شعبا يعي ، بالله عليكم لا تعاملونا باستخفاف ، ولا ترمونا بالعبط أو بالسطحيه ، كلنا يعرف جيدا ما فعلت الداخليه ، ولو لم تكن تعرف فأنت لا تستحق منصبك ، دعه إذا لمن يستحق.

المعتقلون السياسيون ، كلنا يعرف أنهم أخذوا من دورهم وأودعوا خلف أسوار التعذيب والإهانه دون تهمه أو محاكمه ، هم بالآلاف ، ويخرج علينا المجلس العسكري ليقول أنه أفرج عن ستمائة معتقل ، يا فرحتي ، يا حلاوه يا ولاد ، ماذا فعلت الثورة إذا ؟؟؟؟ ، هو إحنا كنا بندن في مالطه ، لا أعتقد أن هذه هي طريقة التعامل في الفتره الحاليه ، ولا أعتقد أن هذا البطئ الشديد في مصلحة أحد كائنا من كان ، "لا اللي راح هيرجع ، ولا الناس هتنسى سكة ميدان التحرير..!!"

ليل نهار تصلنا رسائل على هواتفنا الجواله من القوات المسلحه ، تطمئننا ، وتكرر دائما أن المجلس الأعلى للقوات المسلحة يدرك مطالبنا جيدا ، وأقول يا أيها المجلس الموقر ما عهدناكم أهل أقوال ، عهدناكم أهل أفعال ، فلن يطمئن قلبي ببضع كلمات تصلني على جوالي ، لكن يطمئنني أن أرى ما أطلبه يتحقق ، وأخيرا ، إلى كل صاحب منصب ، ومن كان صاحب منصب يحلم - عبثا - بالرجوع إليه ، أقسم لك أن الشعب المصري تغير ، وأقسم أننا ما عدنا نخاف ، وما عدنا نسمح بالتفريط في أي من حقوقنا ، ولن نسمح أبدا أن تكون ثورتنا "ثورة إلا ربع"

تحررت مـــــــصـــــــــر

2011-02-11T08:41:00.000-08:00

الحمد لله رب العالمـــــــــين..

تحقق الحلم أخيرا..

تحررت مصر من الطاغية أخيرا..

تنحى الرئيس رغما عنه

لم يملك خيارا ولا إرادة بعد إرادة الشعب الحر

ربما لا تعبر أي كلمات عن فرحتي الآن

اللهم لك الحمد كما ينبغي لجلال وجهك وعظيم سلطانك

بسم الله الرحمن الرحيم

( قل اللهم مالك الملك تؤتي الملك من تشاء وتنزع الملك ممن تشاء وتعز من تشاء وتذل من تشاء بيدك الخير إنك على كل شيئ قدير )

صدق الله العظيم ..
( آل عمران 26 )

عشرين عشره..!!

2010-12-29T21:57:00.000-08:00

لم أكن يوما ممن يكتبون مذكراتهم ، رغم استحساني للفكرة كثيرا ، فكم هو جميل أن تدون حياتك يوما يوما ، كم هو ممتع أن تسترجع مشهدا كان محي تماما من ذاكرتك ، أن ترى رأي العين أشخاصا تاهوا في زحام العمر ، أن تستعيد صباك ، وتزيح تلك التجاعيد التي غيرت وجهك ، أن تزيحها ولو كحلم يقظه ، وربما تبسمك يقهر بعضا منها حقا ، ربما أفكر يوما في كتابة مذكراتي.

كعادتي ، لم أدون العام العاشر بعد الألف الثانية من الميلاد كما لم أدون ما قبله ، إلا أنني أتذكر معظمه جيدا ، هو عام فارق في حياتي ، وقليلة هي تلك الأعوام الفارقة في حياتي..

تخرجت أخيرا ، تفوقت على نفسي أخيرا ، تحديتها وربحت التحدي بجدارة والحمد لله ، قد كنت من عامي الأول في الكليه من هواة التأجيل ، حتى فوجئت في عامي الأخير بالكليه أن عندي مواد سنتين من أصعب سنوات الكليه ، باطنه...أطفال...جراحه...نساء وتوليد ، ذاكرت ونجحت ، ورغم أن تقديري في العامين هو "جيد" إلا أن ذلك نسبة إلى ما قبله يعد تفوقا كبيرا ، وانتصارا على نفسي الأمارة بالسوء.. :)

عملت أيضا ، بداية عملي كانت بمستشفى خاص بالزقازيق ، ربما هي الوظيفة الأقل شأنا التي يعملها طبيب قط ، هي مجرد وظيفة إداريه بحته ، "تليفونيست"... هكذا أراها ، فغاية عملك أن تكون حلقة الوصل بين المرضى والأطباء المعالجين لهم....
- أنــــــــا : ألو ، أيوه يا افندم مع حضرتك فلان الفلاني من مستشفى كذا ، حالة سيادتك عندها مغص ، حضرتك شايف إيه؟!!!
- الدكتور : إديله يا ابني أمبول بسكوبان...تيت..تيت..تيت
شعرت بكثير من قلة القيمه ، وقد علمني والدي - رحمه الله - عندما أفكر في أمر ما ، أن أجعل المال هو آخر جوانب التفكير في الموضوع ، تركت الوظيفة بعد شهر واحد..!!!

صديق لي له ابنة عم تعمل موظفه بمستشفى السلام التخصصي ، عرضَت عليه أن توفر لنا فرصة لنتدرب هناك ، المستشفى رائعه ، وانتظام العمل هناك رائع ، استفدت كثيرا ، وما أن رآنا مدير الإستقبال حتى عرض علينا العمل بمستوصف خاص لديه ، وافق محمد على الفور..
- أنـــــا : يا محمد أنا لسه ماعرفش أسماء الأدويه..
- محمد : ملكش دعوه أنا هاعلمك كل حاجه..
محمد تدرب في عدة مستشفيات قبل مستشفى السلام ، وعمل كمدير صيدليه لمدة ثلاث سنوات ، له خبرة تفوق سنه ومرحلته الدراسية كثيرا ، عملنا معا ، كان الأجر زهيدا جدا ، بالكاد يكفي الطعام والمواصلات ، في شهرنا الأول ، كان محمد يقوم بكل العمل ، ويعلمني أيضا ، ومع ذلك أصر أن نقتسم المال سويا ، رفضت كثيرا ، لكنه ربط بقاءنا في العمل بأن نقتسم المال ، وافقت على مضض ، تعلمت الكثير من محمد حياتيا وعلميا ، أحمد الله أن رزقني به ، أدام الله ودنا.

دخل إلى حياتنا الشيخ محمود ، شاب يصغرني - سنا - بعامين ، لكنه يكبرني - دينا وخلقا وفقها - بمئات السنوات ، تأثيره الأكبر كان على أخـَوَيَّ الأصغرين إسلام وأحمد ، قبل أن يتعرفا عليه كانا شابين كباقي الشباب ، مدرسة بالصباح ، دروس ، تلفاز ، إنترنت ، لعب كره ، ثم أضف إلى ذلك بعض صلاة وبعض قرآن ، وبعد أن عرفاه - أو عرفهما - تبدل الترتيب تماما..صلاة..قرآن..دراسه..ثم أضف بعد ذلك ما تشاء - أو لا تضف - ، الآن هما يؤمان الناس بالصلاه ، أوشكا على ختم القرآن الكريم حفظا ، كم كنت أحزن أن أحدنا لم يكن ولدا صالحا يدعو لوالده ، وها قد صار له ولدان - أحسبهما - صالحيـْن ولا أزكي على الله أحدا ، ولكم أستحي منهما ومن الله عندما أجلس لأشاهد فيلما وأجدها يغضان البصر عنه خوفا من الله عز وجل ، جزى الله الشيخ محمود عنهما خير الجزاء وبارك فيهما وثبتهما على الإيمان.

عدت إلى الإهتمام بالتدوين ثانية ، وعدت إلى الكتابة بمنتدى الفردوس الذي هجرته طويلا ، ولكم يسعدني ذلك ، فكم هو جميل أن يكون لك أصدقاء لم ترهم قط ، تحبهم ويحبونك دون هدف أو غايه ، يحبون شخصيتك وأفكارك وثقافتك ، ولا يعنيهم من أنت ، قدر ما يعنيهم ما أنت عليه ، هي صداقة أفكار وثقافات وعقول ، صداقة من نوع مختلف..ومميز.

ختام العام مسك ، رغم مروري بشدة جعلتني أعتقد أن العام أبى أن يمر إلا بعد أن يضايقني ، لكنه لم يفلح :) ، فقد بينت لي تلك الشدة كثيرا مما لم أكن أراه ، بينت لي من هو صديقي الحقيقي ، الصديق الذي يظهر وقت الضيق ، ليحمل الهموم عنك حملا ، ربما هي المرة الأولى منذ وفاة والدي التي أشعر فيها أنه لم يمت ، وجدت حولي من يقف بظهري ، يقيمه قبل أن ينحني ، يدافع عني مثل أبي تماما ، يقول عني ما كان أبي ليقوله لو كان بيننا ، وجدت من آثرني على نفسه وولده ، وساندني إلى حد لم أتوقعه منه ، ولم أنتظره ، ولم يخطر ببالي أن أطلبه ، الحمد لله أن لي مثل هؤلاء ، بارك الله فيهم وجزاهم عني وعن إخوتي خير الجزاء.

تعادل الأهلي والزمالك يرضيني شخصيا ، أرى أنه تعادل بطعم الفوز للأهلي ، وأرى - بخلاف نقاد كثيرين - أن الأهلي (بهدل الزمالك) ، وأن الأهلي ربح من المبارة ما لم يربحه طوال الدوري ، تكفينا عودة الروح ، وعودة كل لاعب إلى مستواه ، وإن شاء الله الدوري للأهلي ، وليس لإبراهيم حسن كما كان يشير ، كابتن زيزو...شكرا.

أخيرا.. وداعا 2010 أحببتك حقا ، الحمد لله حمدا كثيرا

وأهلا 2011 ، أسأل الله أن يبارك فيك ويصلح حالك

اللهم آمين

عاوز أتجوز..!!

2010-12-14T10:51:00.001-08:00

أخيرا..انتهيت من دراستي ، وبدأت مرحلة جديدة في حياتي ، مرحلة العمل ، وبدأت أفكر في أن أكمل نصف ديني ..(علام واتعلمنا..شغل واشتغلنا..يبقى مش فاضل غير الجوااااااااز)..هكذا بدأت أفكر ، أو هكذا هو الطبيعي ، أو هكذا هي سنة الحياه ، وبما أنها كذلك ، وبما أن الزواج أمر حتمي - للأسوياء - ولابد منه ، فلابد إذا للزواج من زوج - اللي هو أنا - وزوجه.

وبما أن الزوج - اللي هو حضرتي - موجود بالفعل حي يرزق يعيش ويتعايش ، وبما أنه - اللي هو حضرتي برضه - طوال عمره مستقيم و راجل دغوري ، فهو إلى الآن غير مرتبط - لا رسميا ولا عاطفيا - بأية أنثى على وجه البسيطه ، وجعلني ذلك أفتح المجال لخيالي في تخيل تلك التي تصلح أن تكون لي زوجة ولأولادي أما ، احترت قليلا - أو كثيرا - ثم بدأت في اشتراط صفاتها بكثير من الطمع - مهو مش أصوم أصوم وافطر على بصله - ووجدتني أسرد قائمة متخمة بصفات قلما تجتمع في امرأة واحده ، ثم أشطب هذا ، وأمسح ذاك ، وأبدل وأعدل ، حتى لأني لم أعد أتبين القائمة من كثرة الشطب والتعديل.

----------------------------------

* متدينه : آه متدينه ، بس مش متشدده يعني ، مش كل حاجه عندها حرام وبدعه وضلاله ، وبرضه مش فاتحاها ع البحري وكل حاجه عندها حلال ، وبرضه متدينه جوه وبره ، مش بره بس في اللبس ، ومش جوه بس وتقول ربنا رب قلوب ، تاخد بإيدي إلى صراط الله المستقيم ، تساعدني على الإلتزام الديني الحقيقي ، مش الظاهري ، تربي ولادي تربيه دينيه سليمه ، فيكونوا "ولد صالح يدعو له"

* على خلق : طبعا لازم ، مهو مينفعش تكون متدينه وسيئة الخلق يعني ، يعني تبقى عارفه كويس ان "الدين المعامله" ، طب بمناسبة الخلق ، هو ينفع أتجوز واحده كانت بتعرف ولاد ؟!! طب ينفع يبقى لبسها مش شرعي؟!! طب لو بتكلم ولاد بحجة الزماله ؟؟ أو لبسها خارج شويه صغيرين ؟؟؟ وطب لو بتعمل ده كله عن غير فهم؟؟؟ بصوا...مينفعش..فيه حاجات لا يمكن أبدا أتنازل عنها في البنت اللي هارتبط بيها.

* الحياء : يا سلام ، أحب أوي أوي البنت اللي عندها حياء ، بس مش الخجل اللي يخليها تفرط في حقها ، أو متعرفش تدافع عن نفسها وتقول بتكسف ، لأ الحياء اللي بيخليها رقيبه على نفسها ، ومبتتصرفش غلط عشان عندها حياء مني ومن ربنا ، وحياء انها تقابلني أو تقابل ربنا وهي غلطانه ، مش هابقى محتاج مثلا أنزل معاها وهي بتشتري لبس ، لأنها لوحدها هتشتري لبس شرعي ، لأن حياءها هيمنعها من التبرج ، مش هاحتاج أقولها تعامل زمايلها في الشغل ازاي ؟؟ ، أو تعامل أهلي ازاي ، مش هاراقب تصرفاتها لأن هي بتراقب نفسها..

* العقلانيه : الست العاقله دي نعمه ، وربنا يحفظنا من الست الشعنونه المجنونه ، ممكن بكل سهوله تجنن الراجل..

* متعلمه مثقفه : وماقصدش الشهاده اللي معلقاها ع الحيطه ، ياما ناس معاها شهادات وكأنهم مش متعلمين..

* النضج : تبقى عارفه يعني إيه جوااز ، وفاهمه إنه رحلة كفاح مش مصيف ، وانه انتقال من مرحلة الراحه والإسترخاء واللا مسئوليه إلى مرحلة الجد والتعب والمسئوليه وتأدية رساله في الحياه ، وإنجاب أبناء قادرين على العطاء ، والارتقاء بالوطن ، وتبقى فاهمه إن القفه أم ودنين يشيلوها اتنين ، لو يوم هي تعبت من المشي والشيل ممكن أشيل من نصيبها شويه ، أو أشيله كله على حسب تعبها ، لكن في نفس الوقت لو أنا تعبت لازم تشيل مكاني شويه..

* الرضا والقناعه : بحق وحقيقي مش كلام ، أصل يا بنت الحلال أنا محيلتيش غير مرتبي ، آه ليا دخل تاني ، بس لنفرض إن الدخل التاني ده وقف لسبب ما ، تعبت مثلا ، أو حتى بدون سبب رزقي كده ، ساعتها نفسي تمشي البيت بالمرتب وانتي راضيه ومبسوطه ، مش وانتي زهقانه مني ومن عيشتي الهباب..

* الإجتماعيه وصلة الرحم : نفسي في واحده تقربني أكتر من أهلي واصحابي ، متبقاش زي البنات اللي بتبقى عاوزه الراجل بطوله ، من غير لا أهل ولا قرايب ولا اصحاب ولا حبايب غيرها ، وكأنه سقط عليها من السماء ، لا أم ولدته ولا أب صرف عليه دم قلبه لحد ما بأى فارس أحلامها

* روحها حلوه : فيها ناس أول ما يتكلموا معاك تحبهم وترتاحلهم ، نبرة صوتهم بتدخل القلب على طول ، لا فيها حقد ولا كدب ولا خبث ، من نقاءها تلاقيها عششت جواك ، اخترقتك ، وأثرت فيك تأثير أكبر من حجمها بكتير..

* بنت ناس طيبين : أكيد البيت له نصيب الأسد في التأثير على الشخصبه ، وإذا كان الأهل كويسين وأحسنوا التربيه فغالبا سيكون الأبناء كويسين (إقلب القدره على فمها تطلع البنت لأمها) ، وعشان برضه لو حصلت مشكله في يوم وراحت اشتكتني لأبوها يحكم عقله ، مش يسمع لبنته وخلاص ، وإن كنت أنا من أنصار ألا تخرج المشكلات الزوجيه بره عتبة البيت ، أيا كان حجمها ، إلا بأى إذا استعصى علينا أنا وهي حلها

* هادئه ، مرحه ، تجيد الاستماع أكثر مما تجيد التحدث (صعبه دي) ، قابله للإقتناع بالرأي الآخر ، وقابله للنقاش ، تحتويني حين انفعالي..

* متكونش أطول مني ، ولا تكون تخينه ، فيما عدا ذلك لا اشتراطات شكليه معينه ، المهم أن أراها أنا جميله ، وأن تتقبلها عيني من أول نظره

----------------------------------

انتهت القائمه ، كانت أطول كثيرا من ذلك ، لكنها صارت هكذا بعد القص والتهذيب والإختزال ، ألم أقل لكم أنها صفات قلما تجتمع في امرأه؟؟
وإن حدث واجتمعت فلماذا تقبل من هي بتلك الصفات أن تتزوج بي؟؟؟ ماذا لدي أنا لأقدمه لها؟؟ هي تستحق أفضل مني بكثير ، المهم أني لن أيأس وسأواصل البحث ، وربما أجدها ، وربما تقبل بي زوجا إذا كان حقا كما يقولون "مراية الحب عميا"

((أكتب(ي) صفات فتاة( فتى) أحلامك ، ربما تتفق أو تختلف معي ، فللناس فيما يعشقون مذاهب))

بيسألوا إيه السبب..!!

2010-11-22T14:39:00.000-08:00

(باللهجه الصعيديه)

بيسألوني يا أمي ليه..

إحنا كده

زي الملايكه طيبين

وازاي ابونا يموت

وسنين علينا تفوت

واحنا كده ف نفس الطريق ماشيين؟؟!!

فين الغرابه في الطيابه؟؟!!

والا لزمن نبقى كيف حبة ديابه..

ف وسط غابه..

مسعورين؟؟!!!

***

مكنش ينفع

تبقي إنتي أمنا..

ويقل فينا الحس

أو نغير دمنا..

أو يوم ضميرنا يخس

مكنش ينفع إننا نهجر براحك..

أو مزاحك..

أو مساكي أو صباحك

أو عنيكي السهرانين

أو دموع الفرح منك..

لما تروي فرحنا..

ويكبر لحد الشمس

والا حزنك لما نحزن..

والدموع واقفه بعينك..

قوم تمس القلب مس

مين هيفضل وانتي جنبه..

يوم حزين؟!!

***

مكنش ينفع

تبقي زهره..

ريحها زي المسك

جمالها فيها

آسر الدنيا وماليها

ونبقى إحنا زي شوكك

مكنش ينفع

يبقى قلبك لو يدق..

صوت يحق الحق حق

ونبقى إحنا صوت شكوكك

مكنش ينفع تبقي شمس منوره..

طول الزمن

ومنتوجدش إحنا شروقك

مكنش ينفع

نبقى غير ليكي وفداكي

أصل إيه الدنيا يا امّا..

غير رضاكي؟!!

أصل فين الجنه تبقى..

غير حداكي؟!!

فمكنش ينفع غير نكون

سندك وعونك

حته منك..

زي دمك بين عروقك

مكنش ينفع تبقي جنه..

واحنا نسعى لاجل نار

ولاكانش ينفع نبقى ليل..

وانتي النهار

فداكي دمي وروحي يا اما..

ويبقى ده أبسط حقوقك

***

مكنش ينفع

نترك العهد القديم

ونسيب طريقنا المستقيم

نقلع هدومنا وننكشف

وتوب أبونا اللي ساترنا

مكنش ينفع نختلف

جدي زمان قال كلمتين

لما قالوله ابنك ضناك..

مبقاش معاك

جدي زعق يادي القرف

جاب مصحفه وعليه حلف

قال ابني ده باب الدار

مهما انفتح أو دار

لزمن يرد مكانه

هروبه مش بإمكانه

ملوش مكان تاني

مهما انحرف

ومهما أنكر سكته..

وأصله وفصله وقصته..

راح يعترف!!!

طبعا أكيد راح يعترف..

مين ده العبيط؟!!

اللي يضيع حب أكبر م الحياه..

أكبر من الروح اللي فيه..

حب مش عارف ده يطلع زي إيه

وحنان لا يمكن يتوصف..!!

الفرح..!!

2010-10-31T04:22:00.000-07:00

لا أدري لماذا أحيانا ننحي مبادئنا جانبا ، نتخطاها لنفعل شيئا نريده ، ثم بعد أن ننتهي لا نجد أدنى حرج في أن نعود - أو ندعي العودة - إليها كأن شيئا لم يكن ، كأنها كقطع ملابسنا التي نرتديها أحيانا ونهملها أحيانا أخرى ، ولا يحق لأحد أن يعترض أو ينتقد وإلا اتهمناه بالرجعية والمحدودية ، وقلنا بكل بساطه : "ده يوم في العمر وعاوزين نفرح" .

ما أعرفه أنا وأقتنع به ، أن الفرح بالقلب ، ومهما كانت وسيلتي للتعبير عن مدى فرحي ، فلن يقلل أو يزيد ذلك من الفرح شيئا ، إني أفرح بقدر الحدث ، لابقدر تعبيري عن فرحتي ، فلماذا إذا أتمادى في مظاهر الإحتفال ، لأخرج عن حدود الأدب والتقاليد (الله يرحمها) والشرع أيضا..!!

كنت في فرح إحدى قريباتي بالإسماعيليه ، ومن قبله بفرح أحد أصدقائي بالشرقيه ، الفرحان مكرران تماما ، ما حدث بالشرقيه حدث بالإسماعيليه ، رغم أني اعتقدت أن ما حدث بالفرح الأول هو استثناء ، لم أكن أعلم أننا ( تطورنا ) إلى هذا الحد..!!

الكل يرقص ، رجالا ونساءا ، شبابا وشابات ، وأطفالا بالكاد يعرفون المشي..يرقصون أيضا ، والغريب أن كل من رقص يدعي أنه من أسرة (محافظه) ، البنات - ما شاء الله - كلهن محجبات ، لا يرتدين البنطال أبدا لأنه (عيب) ، لا يضعن (المكياج) لأنه أيضا (عيب وحرام) ، لكن في مناسبة كهذه لا بد من "شوية هز وسط" لأن "الشيء لزوم الشيء" وكيف يصبح فرحا دون رقص؟!!..تناقض عجيب جدا أستغربه كثيرا..!!

يبدو أنني حقا أصبحت رجعيا أو موضه قديمه أو "محبكها زياده عن اللزوم" ، ويبدو أيضا أني كما قال لي البعض اللي زيي خلصوا من زمان ، إحدى البنات ممن رقصن طيلة الليل من أسرة صعيديه ، أبوها يضيق عليها كثيرا ، البنطلون ممنوع..المكياج ممنوع..الخروج من البيت بعد المدرسه ممنوع..الخروج بمفردها أصلا ممنوع..تخيلوا أنه منعها من أحد الدروس لأنه متأخر قليلا وتعود منه "قريب المغرب"...الراجل حمش بصراحه..ولما رأى ابنته ترقص في الفرح ، يلتف حولها شباب أقل ما يقال عنهم أنهم "غير مريحين" ، وجدته قام من مكانه ، قطع الصفوف في عجاله ، استأذن هذا وذاك ليمر ، ثم.. ما أن وصلها حتى ابتسم وأخذ يصفق لها في حراره..!!!

وآخر صعيدي أيضا ، أخذ طيلة الليل يرقص مع ابنته ، يعلمها فنون الرقص التي يجيدها أكثر من "الحاجه دينا" ، ما أن تخطئ في حركة ما حتى يعيدها عليها مرات حتى تتقنها ، نعم الأب هو ، نعم القدوه ، لا أتخيل أصلا كيف يستطيع أب كهذا أن يقول لابنته هذا عيب أو هذا حرام؟؟!! ، أصلا كيف لهذا أن يقف عند حدود العيب والحرام؟؟!!

في فرح الشرقيه ، العريس طبيب ، العروس محاميه ، والد العريس ووالدته مدرسا ثانوي ، والد العروس مستشار ، أي أنها عائله مثقفه ومحترمه ، ولا أقلل أبدا - حتى بعد ما حدث بالفرح - من احترامي لهم جميعا ، العريس أحد أعز أصدقائي ، وربما لو طفت الدنيا لسنوات لن أجد صديقا مخلصا مثله ، لكن ما حدث ضايقني ، فالعائلتان ترقصان بكامل عددهما ، المقاعد شاغرة والكل يرقص ، ولما عاتبته بعد الفرح قال لي مستغربا :" هو فستان العروسه مش كان حشمه ومش مبين أي حاجه؟ يبقى فين المشكله؟!!!"

يا أخي ليست المشكلة في أن يظهر شيء من جسدها أو لا ، المشكلة هي مفاهيمنا التي تغيرت كثيرا ، أصبح فهمنا مغلوطا لكثير من نواحي حياتنا ، وتوغلت بداخلنا تلك القناعات الفاسدة التي يبثها لنا الإعلام ليل نهار ، المشكلة هي أننا فقدنا كثيرا من ذلك الحياء الشرقي الشرعي ، فقدنا احترامنا لجسد المرأة الذي لا بد أن يصان ، لا أن يصبح صيدا سهلا لعيون مريضة تكاد أن تلتهمه التهاما ، فقدنا أيضا كثيرا من معاني الرجولة ، فلم يكن الرجل ليسمح لزوجته أو أخته أو ابنته أن ترقص بحال من الأحوال ، وكنا تقريبا لا نرى رجلا واحدا يرقص إلا "صبي العالمه" ، لأنه أصلا مشكوك برجولته ، ثم أصبح كل الرجال يصفقون لزوجاتهم وبناتهم عندما يرقصن ، وأصبح كل الرجال يرقصون دون أدنى حرج أو غضاضه..!!

تقول أمي :"ما ستكون ردة فعلك لو وجدت عروسك ترقص أمام الناس طوال الليل" ، فقلت لها :" إن من سأختارها سيمنعها حياؤها من أن تفعل ذلك قبل أن أمنعها أنا، ولو لم تفعل ، ولو لم تمتلك هذا القدر من الحياء ، فسأوقن حينها أن اختياري كان خاطئا تماما ، ولا أعتقد أني سأستطيع أن أكمل حياتي معها..!!""

تقريبا قررت أن لا أقيم فرحا ، مجرد إشهار بالمسجد ، وليمة ضخمة للأهل والأحباب ، زفه جميله ربما أقودها أنا ، وربما تطول لساعات ، وحتى لو "العربيات رقصت" ، فهو أهون كثيرا من أن ترقص النساء ، وأن أشارك أنا في الوزر لأني صاحب الليلة ومقيم الفرح ، واتهموني كما شئتم أنني رجعي ، معقد ، طراز قديم ، أو حتى متخلف ، وإن اعتبرتم هذا تخلفا فإني والله أحمد الله كثيرا على هذا (التخلف).

يا سيدتي..!!

2010-10-23T01:31:00.000-07:00

يا سيدتي..

لا لن يفنى شبح الماضي

لا لن أخرج من رئتيك

لا لن يصبح بيني بينك أي حدود..!!

سيظل يدق القلب بإسمي..

حرفا حرفا

سيظل يحلق طيفي حولك..

حلما علما

من هم مثلي..

لا للذكرى..بل لخلود..!!

***

يا سيدتي..

لا لن يصبح حبي عبثا..

حدثا مثل الأحداث..

يمر ويمضي..

ذكرى تحكى..

نسخر منها..

أو لا تحكى..

بل لا تأخذ منا إلا..

بعض شرود ٍ..

ثم نعود..!!

لا لن يصبح حبي ذكرى..

حبي أمر حتمي..

مثل الشمس ومثل الأرض ومثل الماء..

من ينكر هذي الأشياء؟؟!!

حبي باق يا سيدتي بين ضلوعك..

لن يصبح ماض مفقود..!!

***

يا سيدتي..

حبي قدر..

من يختار القدر - فيبقى؟!!

أو يأباه..

فيمضي القدر كما المظرود؟!!

حبي نار..

لن يطفأها حتى الموت..

حتى الموت سيعجز عنها..

يا سيدتي..

لا لم تنسي..

لا لم أترك قلبك أبدا..

مهما طال البعد فإني..

سوف أعود..!!

***

يا سيدتي..

أحيي عيدك..

عيشي زعمك أني مت ومات الحب..

عيشي زعمك أن أمسكت زمام القلب..

وأنك دوني يومك عيد..

وإني أعلم أني باق..

بين دماك..

وأسري فيك بكل وريد..!!

وبرضه بنحبك يا مصر..!!!

2010-09-26T21:38:00.000-07:00

الأستاذ وائل الإبراشي رئيس تحرير جريدة "صوت الأمه" متهم بتحريض المواطنين على عدم تقديم إقرارات الثروة العقارية ،وده بس عشان عمل سلسلة تحقيقات عن الضريبه العقاريه وعدم دستوريتها ، ومش عارف فين بأى الديموقراطيه وحرية الرأي والتعبير لما الصحفي اللي هو صحفي يتحاكم لما يقول رأيه أو يدافع عن الناس.

مهو يا حكومتنا العزيزه يا ريت ترسي على بر وترسينا معاكي ، هل إحنا دوله ديموقراطيه فعلا وكل واحد من حقه يقول اللي هو عاوزه في الوقت اللي يحبه؟!! ، والا إحنا دوله ديكتاتوريه كل واحد فيها يحط لسانه جوا بقه ويسمع الكلام ويرضى بالأمر الواقع وخلاص؟!!

أنا شايف إن إحنا لا دول ولا دول ، إحنا عملنا - لا مؤاخذه - زي اللي رقصت ع السلم لا اللي فوق شافوها ولا اللي تحت سمعوها ..يعني لا احنا بقينا دوله ديموقراطيه عارفه تستفيد من الديموقراطيه في إصلاح البلد..ولا الحكومه راضيه تقول إنها مبتقبلش كلام من حد و"دعونا نعمل في صمت" رغم إن الحكومه لو قالت كده هاحترمها..هتبقى حكومه عارفه هي إيه بالظبط ، ومش عاوزه دوشه ملهاش أي لازمه لا هتقدم ولا هتأخر ، وع الأقل هتريحني وهاوفر صوتي وحبر قلمي لحد ما ييجي حد يعرف يسمعنا ويفهمنا من غير ما يحبسنا لما نقول رأينا..!!

إنما إن الحكومه تقطع لسانا بسكينه تلمه وبعدين تقول بعلو صوتها : " إتكلموا..فنحن دوله تكفل حرية الرأي والتعبير..فتبقى كده الحكومه بتتغرغر بالمواطنين الأبرياء وبتضحك عليهم..
طب ليه اديتونا اقلام..لما الكتابه بقت..في نظركوا عيب وحرام..!!

أزمة الملخصات ، مش عارف لمصلحة مين إن الطلبه متلاقيش كتب تذاكر منها ، مهو اللي يقول إن كتاب الوزاره ده كتاب أصلا ، أو إن الطالب اللي يذاكر منه هينجح يبقى يا إما مش فاهم حاجه يا إما تبع الناس التانيين ، يقوموا كمان يمنعوا الكتب الخارجيه اللي هي في الواقع المصدر الوحيد للمذاكره واللي من غيرها الطلبه هتسقط ، واللي هي برضه الناس ممكن تبطل تاكل وتشتريها عشان عيالها ربنا يكرمهم ، طب ياللي بتقول إن كتاب الوزاره حلو و100 فل وعشره ، الناس اللي بتشتري كتب خارجيه دول هبل والا غاويين فقر؟!! ، في الواقع هما غاويين علم ، ونفسهم يشوفوا ولادهم أحسن ناس..ربنا يجازي اللي كان السبب في الأزمه ويديله على قد نيته لا أكتر ولا أقل.

المصريين كالعاده بيتصرفوا ، ولسه متخلقش اللي يكتف المصري ، ويطلعه قليل الحيله ، دلوقتي الكتب الخارجيه في القاهره بتتوصل ديليفري للبيوت بالليل (عقبال الأقاليم) ، هي آه غاليه شويه بس مش مهم ، المهم العيال تلاقي كتب تذاكر منها ، واللي عاوز كتاب يتصل على أي مطعم ..."معاك واحد بيتزا الأضواء تالته سنوي...لو سمحت نص كيلو مشكل تالته اعدادي..ومعاك واحد المثالي فيزيا وصايه وكتر المسائل..وعندك اتنين سلاح التلميذ في اللذيذ وصلحه."..الحكومه فاكره إنها في مسألة الكتب حكمت..لكن الشعب قال للحكومه :"ميحكمش..!!"

كيلو الطماطم بسبعه جنيه ، آه والله بسبعه جنيه ، يعني سعر كيلو السمك ، ويعني برضه إن الأكله العاديه - اللي من غير لحمه - هتتكلف أكتر من 25 جنيه لو حبينا نعمل شوية سلطه جنب الأكل ، طب ولما الغدا يتكلف 25 جنيه ، الناس بأى هتلاقي فلوس منين تفطر وتتعشى وتلبس وتدفع إيجار وميه ونور وتليفون وغاز واقلام وكراريس....إلخ ، وفين بأى بتوع حماية المستهلك ، والله يا جماعه حراااااااااااام ، هو المرتب فيه كام سبعه جنيه ، طب والله فيه ناس بعد ما نقت الطماطم ، سمعوا السعر سابوها تاني وقالوا منقدرش على تمنها ، يعني الناس لا طلبت تاكل تفاح ولا مانجه ولا - لا سمح الله - جمبري ، يقوموا يغلولهم الطماطم ، حتى الطبيخ اللي الناس بتاكلوا بالعافيه وبيعمل حموضه مبقيناش عارفين نطبخه ، رضينا بالهم والهم مش راضي بينا..لنا الله..!!!

ملاحظ إن مرشحي مجلس الشعب السنه دي عاملين دعايه جامده جدا ، والجميل في الموضوع إن صورهم ماليه الشوارع زي نجوم السيما ، لأ ومتصورين صور سنيمائيه بجد ، والله فيهم ناس تنفع تمثل ، شكلهم فوتوشفيق خالص ، وربنا يخليلنا الفوتو شوب ، أنا شايف إن الدعايه الحقيقيه للمصور ولفني الفوتوشوب بجد عاملين شغل رائع..!!

أحد المرشحين المحترمين كاتب على إحدى لافتات الدعايه بتاعته "الحمد لله إحنا معانا ربنا والحكومه والشعب"...طب معاك الحكومه وفهمناها لأنك مرشح الحزب الوطني ، وربنا الله أعلم إيه بينك وبينه ، إنما الشعب دي جبتها منين ، الشعب أساسا لا طايق الحزب ولا طايق الحكومه ، وصعب دلوقتي تبقى مع الحكومه والشعب في نفس الوقت ، يا سيادة المرشح المحترم حدد هدفك وشوف انت مع مين واللي تغلبه إلعبه يا عمنا ، وسيب الشعب في حاله إن شالله يتحرق بجاز ، وبعدين يا سيدي اللي معاه ربنا والحكومه والشعب بيعمل دعايه ليه أصلا ، مهو كده كده ناجح ، وفر بأى فلوسك ، ومرشح الحزب...بينجح رضا أو غصب..!!!

أحـــمـــق ٌ أنــــــا..!!!

2010-09-05T01:48:00.000-07:00

أحمقٌ أنا..

إذ ظننت الحب ضربا من جنون

إذ ظننت بأن قلبي لن يدق..

ولن يدق العشق بابي..

أو يزور الشوق عيني

إذ ظننت بأن حبي..

لن يكون!!!

إذ كنت يوما لا أحبك..

كيف؟!!

لا أدري..!!!

أكان عذرا أن جهلتك؟؟

لم أركِ؟؟

كان ذنبا..

فالقلوب هي المُحبة..

لا العيون

كان حتما أن أحبك..

كل يوم في حياتي

طالما في القلب نبض

كان حتما أن أجوب الكون بحثا

أن أفتش كل شبر في الفضاء

أن أشق الأرض عنك..

طالما في الكون أنت..

فاغفري لي..

فالأحبة يغفرون..

***

أحمق أنا..

إذ رأيتك.. فابتعدت..

قد ظننت لوهلة..

أن السماء بعزها..

لن تحب الأرض أبدا..

لن تراها..

فالأرض أرضٌ..

ما لها إلا السماء..

لو صيغ من ذهب ثراها..

أما السماء فوحدها..

مليون أرض تحتها..

لحبها يتهافتون..

هم يحلمون..!!!

ثم انتبهت..

كيف عشت العمر أنظر..

تحت قدمي؟؟

كيف لم أنظر بعيدا..

مد بصري؟؟

في الأفق تختلف الرؤى..

تهوي السماء بعزها..وبهائها..

وتميل عشقا نحو أرضي..

كيف لم أبصر هنا؟؟

هاهم أمامي..

من قديم ٍ يلتقون!!

***

أحمق أنا..

عندما صدقت يوما..

حينما همسوا بأذني :

"سوف تفني العمر جريا..

خلف أفق ٍ..

سوف يضنيك ابتعادا..

ذاك عُرف الأفق دوما"

إن يكون؟؟

سوف يفنى العمر حبا..

واشتياقا..

من قال أن الحب يمضي..

كالظنون؟؟

من قال أن الحب يوما وفق عُرف ٍ..

قد يكون؟؟

من في الوجود الآن يعرف..

كيف يأتي الحب حتى..

مثل سحر أو جنون؟؟

أو كيف يفعل بالأحبة؟؟

كيف قسرا هكذا يتبدلون؟؟

أو كيف أصلا يعشقون؟؟

لا أحد يدري..

فالحب سر..

أعجز العشاق قبلي..

من سنين

الآن أمضي نحو أفقي..

واثقا..

وسأصل يوما..

واسألوا التاريخ عني..

فالأحبة يلتقون..

ويخلدون..!!!

نجاح..وأشياء أخرى..

2010-08-30T23:13:00.000-07:00

أنا نجحت ، وبدأت سنة الإمتياز الممله ، أنا عن نفسي كنت بنزل الإستقبال من زمان ، واتعلمت كل اللي المفروض أتعلمه في سنة الإمتياز قبل ما تبدأ أصلا ، المهم ، هو النظام كده وخلاص ، لكن أنا بستغرب ، ليه ميعملوش تدريب صيفي لينا على غرار كليات الهندسه مثلا ، كل سنه نتدرب شهر في الصيف على الحاجات بتاعة سنة الإمتياز ، يعني مثلا أنا أخدت السنه دي رمد وأنف وأذن يبقى في الصيف فيه تدريب عملي ليهم ، وهكذا ، بدل ما الواحد بيخلص الكليه ويفاجأ إنه مش عارف يتعامل مع أي حاله ولا يكتب دوا لأخوه اللي عنده إسهال!!!

الخلاصه إني قدامي سنه كامله أعتقد - بناء على تجربة أصدقائي - إنها هتضيع هباء ، أروح أمضي الصبح حضور ، وأشوف أي حته ضله أقعد فيها لحد ما أمضي انصراف ، محدش بيعلم حد حاجه ، ولا حد بياخد بإيد حد عشان يبقى دكتور شاطر ، أساسا محدش فاضي لحد ، مهو الدكتور عاوز يخلص حالاته في السريع عشان يشوفله مستشفى خاصه يشتغل فيها ، والا إذا كان فاتح عياده يروحها ، وعشان يبقى فايق لشغله الخاص أبو فلوس حلوه ، لازم يشتغل للحكومه على قد فلوسهم ، ولو معملش كده يبقى هيشحت هو والعيال وأم العيال!!!

حاجه كمان ، من حضوري في بعض الأقسام في مستشفى جامعة الزقازيق ، لقيت إن النايب - اللي هو المفروض يعلم بتوع امتياز - بيشوفله ييجي 100 حاله في اليوم ، بيتهيألي أنا - كطبيب امتياز - يبقى معنديش دم لو رحت بعد كده أقوله علمني ، أساسا أنا لو قلتله صباح الخير ورد عليا أبقى محظوظ ، لهذا فأنا - زي اللي قبلي واللي بعدي - رايح أشوف حته ضله أقعد فيها!!!!

زمااااااااااااان - مش عارف ليه كل حاجه كانت زمان أحسن هو احنا بنرجع لورا والا إيه؟!!!- كان أبويا الله يرحمه بيحكيلي عن سنة الإمتياز بتاعته ، راح خد إمتيازه في مستشفى ههيا ، وكان أياميها فيه دكتور إسمه د/هاشم نايب نسا ، ودكتور إسمه د/بهاء نايب جراحه ، الإتنين دول كانوا شبه مقيمين في المستشفى ، مبيفكروش في الماديات إطلاقا ، وكان كل همهم إن لما يجيلهم حد امتياز يخلوه دكتور بصحيح ، والنتيجه إن والدي بقى دكتور شاطر وفي سنة الإمتياز بس كان تقريبا بيعمل كل حاجه ، وكان ممكن يشتغل كل التخصصات ، من حالات الباطنه ، للإطفال ،للنسا ، للولاده ، حتى العمليات البسيطه زي الزايده مثلا ، بس عشان يوصل لكده كان ممكن يشيل المستشفى لوحده 3 أيام متواصله مثلا ، هو الطب كده ، ممارسه ، مش كتب وخلاص ، دلوقتي دكتور الإمتياز بياخد 240 جنيه ، طب مهو لازم يدور على شغل تاني عشان يلاقي فلوس يصرف على نفسه ، وطبعا الشغل التاني ده على حساب إنه يتعلم كويس ، وبالتالي بيحصل اللي بنسمعه كل يوم عن إهمال - أو جهل - الأطباء ، والله أعرف دكاتره في التكليف مبيعرفوش يعالجوا النزله المعويه!!!!!

بعيدا عن الطب ، أخويا كمان نجح وبأى مهندس كمبيوتر قد الدنيا ، وبيتدرب حاليا في رايه ، أيوه رايه بتاعت "عاوز نوكيا روح لرايه" ، والأهم من نجاحه في الكليه ، إن مشروع التخرج اللي كان عامله هو وأربعه زمايله أخد المركز التاني في مسابقة Made in Egypt ، يعني االمركز التاني على مستوى الجمهوريه ، واللي سلمهم الجايزه وزير التنميه الإداريه د/ أحمد درويش ، بصراحه سعادتي لا توصف ، والله فرحت بنجاحه أكتر ما فرحت بنجاحي ، مهو مش كل النجاح برضه يا جدعان ، هو بجد تعب في المشروع ده هو وزمايله سنتين بحالهم ، يعني جهد خمس أفراد لمدة سنتين ، يعني كأنهم 10 سنين شغل ، بس الحمد لله ربنا عوضهم خير...من جد وجد..

هي البنات عايزه إيه؟؟؟ سؤال عمري ما شغلت نفسي بيه ، أصل يعوزوا اللي يعوزوه أنا مالي ، لكن الأيام دي المفروض إني أهتم البنات عايزه إيه ، أو ع الأقل البنت اللي هارتبط بيها عايزه إيه ، زمان كان الموضوع بسيط جدا ، كانت البنت عايزه "ضل راجل" وخلاص ، دلوقتي الموضوع اتعقد شويه ، ورغم إختلاف البنات عن بعضهم في طبائعهم وفي اللي هما بيتمنوه ، لكن كل أصحابي اللي خطبوا واللي اتجوزوا اتفقوا إن البنات الأيام دي بقوا هايفين شويه - ده هما اللي بيقولوا أنا مليش دعوه - يعني مثلا واحد صاحبي كان معاه تفاحه ، جاب سكينه وقسمها نصين إدى والدته نصها وإدى مراته النص التاني ، عادي ، لأ عندها مكانش عادي إتخانقت معاه عشان إدى والدته الأول!!!

واحد تاني خطيبته سابته عشان صاحبتها شايفين - مش هي اللي شايفه - إن ودانه كبيره شويه ، وتخيلوا إن هي نفسها معرفتش تطلع فيه عيب غير ده - ده إذا اعتبرنا إن ده عيب - .
وواحد خطيبته أصرت إنه يغير بدلة الخطوبه عشان قال إيه مش ماشيه مع الفستان ، بيقولي طب هي هتلبس فستان موف أجيبلها أنا بدله موف منين؟؟!!!
واحد خطيبته بقالها 3 أيام قافله موبايلها ومش راضيه تكلمه ، ليه؟؟عشان كان مشغول في يوم ومكلمهاش غير مره واحده بس طول النهار!!
وواحد خطيبته سابته عشان مجابش دبدوب في عيد الحب!!!
مش دي المشكله الرئيسيه ، المشكله راح فين إن إحنا "نتفاهم" "نسمع بعض" "نفوت لبعض" "نلتمس عذر لبعض" عشان الحياه تمشي ، لكن معظم البنات بقت عايزه إن خطيبها يعملها كل اللي نفسها فيه ، بغض النظر عن ظروفه وده يناسبه والا لأ...

عارفين الحل إيه ، إن كل واحده لما تكبر وتنضج كده وتعرف هي عايزه إيه تروح تطبع لنفسها كتالوج تديه لأي حد عاوز يرتبط بيها ، هو يقعد يقرأ الكتالوج كويس عشان يعرفها بتشتغل إزاي..قصدي عشان يعرف هيتعامل معاها إزاي...واللي ملهاش كتالوج بأى متزعلش من اللي هيجرالها!!!

الإخوه الزمالكويه الأعزاء مبسوطين من نتيجة الأهلي مع شبيبة القبائل ، زي ما بيتبسطوا لما الأهلي يخسر من أي فريق مصري أو غير مصري ، إحنا الأهلاويه بنؤمن إن اللعب مكسب وخساره ، ومش زعلانين ، ماتش وراح ، وواثقين إن الأهلي ممكن يعوض ، ومش ذنبنا بأى إن الزمالك أقنع جماهيره إن اللعب مع الأهلي خساره بس ، لحد ما بقوا دلوقتي بيتغلبوا من الأهلي ويقولوا إن شاء الله سننتقم من الأهلي حتى آخر لاعب جزائري!!!!

من كام يوم راكب سرفيس ، وبعدين ركب واحد كده شكله طبيعي جدا زينا كده ، بعد ما مشينا شويه لقيته بيسألني ع الساعه ، عادي قلتله الساعه كذا ، جه وهو نازل بأى بيقولي :"إزيك يا باشا" أنا اندهشت وقلتله : "أنا؟!!!" ، قالي : "أيوه يا باشا ، ده إنت وشك بيشع نور والله ، والله بيشع نور" فأنا طبعا إندهاشي زاد ، وقلتله : " إشمعنى كده يعني إنت تعرفني؟؟" ، قالي :"لا والله ، بس أما شوفتك حبيتك لله في لله كده " وراح نازل وسايبني أكمل اندهاشي براحتي ، ومش عارف الراجل ده يطلع إيه بالظبط ، هل هو مثلا أهبل ، والا لا مؤاخذه يطلع يعني....لالالا إن بعض الظن إثم ، والا هو حبني في الله زي ما بيقول ولم يحرج إنه يقولي كده قدام الناس اللي كلهم أكدوا إنه أهبل..اللي أنا متأكد منه إني قليل البخت ، وقليل البخت لما يسمع كلمتين حلوين يسمعهم من راجل وأهبل وبشنب ، امال البنات اللي بيدوروا على عرسان راحوا فين بس؟!!!

دائما للحديث بقيه... :)

مــعــــالــي الوزيــــــــر..!!

2010-05-09T09:10:00.000-07:00

(زمن القراءه 5 -6 دقائق)

في يوم عادي جدا
من الصبح بدري
وأنا ع السرير
قوام بلغوني
قالولي مبارك بقيت الوزير
فرحت بصراحه
ده منصب وجاهه وعالي وكبير
ورحت الوزاره
وقلتلهم اني هارتب زياره
مفاجئه بصحيح
ومن غير دعايه وموكب وزيطه
لقريه صغيره
بعيده بغباوه ومش ع الخريطه
وصلت المحطه
فوجئت بحفاوه وشبه احتفال
زيارتي المفاجئه بقت كرنفال
فقلت اما نرجع حسابكم عسير
وأنا في الحقيقه
فرحت بوجاهتي
وكان ناقص إني أزغرد واطير
وبعلو صوتي وحماس كان مثير
قوام قلت إني
هاحل المشاكل وهيعم خير
هاتولي الشكاوى
جابولي شوال
وشايلينه سبعه شداد وتقال
وقلت اسألوني على أي شيء
لقيت هيصه جامده
ومليون سؤال
ده حتى العيال
بقالهم مطالب
يعيشوا فـ نضافه
وياكلوا كنافه
يشوفوا الزرافه
وساعة رجوعهم
يلاقوا جنينه وملعب كبير
في ركنه المضلل دكك أو حصير
وميه في زير
محوط بسور
عشان لما كوره
تطير غصب عنهم
متكسرش حاجه
لعم الزناتي بتاع العصير..!!

***

وده عم عبده اللي شغال غفير
عاوزله علاوه
عشان بنته زينب كبرت خلاص
وصبحت عروسه وعاوزه جهاز
وخلصت فلوسه عليها ولاص
وابنه عليوه مخلص علام
وأصبح مهندس كفاءه وتمام
ومش لاقي شغله..
بقاله النهارده شهرين وعام
وعاوز فخامة معالي الوزير
يعين عليوه مساعد غفير..!!

***

ودي أم فوزي
ولادها يتامى..وابوها ضرير
وهي وحـــيده
وراضيـــه وسعـــيده
بتزرع وتحصد وبتربي طير
ومحصول قيراطها مكفي العيال
وبيصونها من مر ذل السؤال
ولكن وفجأه القيراط الوحيد
بأى بحكم قاضي بتاع السفير
ولازم يبور
تقول طب عيالي
وابويا الضرير
يقولوا احنا مالنا
وده حكم قاضي
منفذ وماضي
مترغيش كتير..!!

***

وده عم صـــابر
مدرس كبير
مواطن في حاله وطيب أمير
كريم غصب عنه
كريم بالوراثه
وبرضه يا عيني
فقير بالوراثه وحاله عسير
في يوم لو تزوره
تحس إنه فجأه صبح مليونير
وده هو طبعه
ولو كان في ضيقه
وكان صعب وضعه
تلاقيه يكابر
وراضي وصابر
ويمشي فـ بلدهم كده حاجه تانيه
وآخر شياكه وحاطط كلونيا
كأنه الوزير
ودلوقتي باين في عينه انكسار
كلامه مغمس بقهر ومرار
بقاله النهارده عامين ع المعاش
ومعرفش يقبض
عشان بس غلطه
بطاقته القديمه
بها اسم أمه مدون سهير
وورق الحكومه
بيقول إن أمه بتدعى سمير..!!

***

ده حتى المحشش وعمره ما فاق
كاتبلي عريضه وشبه اتفاق
بيقول ليه يا باشا منعتوا الحشيش
بدور عليه ويقولولي مفيش
وطبعا سعادتك أكيد برضه عارف
وبالحال خبير
إن الحشيش ده بيعمل عجايب
ويمنع يا باشا مصايب كتير
بينسينا حالنا
ويمسح عقولنا
ونسمع خطبكم نقول يا سلام
يا محلى الكلام
بلدنا في خير
نعيش جوه حيطنا بكل التزام
تلاقينا دايما نشد الحزام
ورغم النوايب
بندفع ضرايب
ولو حتى بعنا الدولاب والسرير
بننسى با باشا إن فيه ناس سيادتك
بياخدوا فلوس اللي زيي وزيك
ومن خير بلدنا بيملوا زكايب
وليهم مواكب
ولابسين حرير
كأن اللي فيها محرم علينا
كده بين إيديهم
مبعتر وسايب
ولا مين يحاسب
ولا فيه ضمير
(ده هو اللي كاتب)
أما صحيح واد معفن حقير..!!

***

وآه ياني يابا
ويا رب دايما تعين الغلابه
ده إنت المعين
بقالي النهارده كده جمعتين
ببص فـ شكاوى مهيش ناويه تخلص
وكل أما احس إني ممكن أخلص
تزيد مره واحده وتملى الشوال
كأن اللي حاصل ده سحر وخيال
وجوا الشوال عفريتين م التقال
ومارد خطير
ده إيه اللي شقلب كيان البلد دي؟!!
وإيه المصير؟!!
ده دي قريه واحده
ومش ع الخريطه
وفيها مشاكل تحل فـ شهور
ما بالنا يغيرها..وغيرها كتير
مينفعش ليها ولا 100 وزير
وأنا بعد حيره وتفكير كتير
وعقلي خلاص كان مقرب يطير
رميت الشكاوى وكلام العيال
معنديش إجابه لمليون سؤال
وليكوا فـ رقبتي فقط إمضا واحده
كبيره وواضحه
على ورقه واحده
وفيها استقالة معالي الوزير..!!!

***

بَـــدَوَّر..!!

2010-04-26T17:45:00.000-07:00

بَـــدَوَّر في الكلام كله

على كلمه

تبوح بالسر

تفضحني

ده كشف السر يفرحني

لأني طول م انا كاتمه

وضهري ع الدوام محني

***

وادَوَّر في الكلام كله

على كلمه

تكفي كل إحساسي

وتوصفني ولا تخلص

إلى ساسي ومن راسي

وتعلن للوجود كله

خبر حبي

وحبيبي في البعاد ناسي

وانا من شوقي وسهادي

حروفي تقول كلام وتعيد

وشعري ملو كراسي

***

وادَوَّر في الكلام كله

على كلمه

مداد البحر يكتبها

ولا يكفيش

عشان شايله على حروفها

سنين من كتر أحمالها

تحسها واقفه مبتمشيش

ليالي تاهت نجومها

ولا عمر القمر زارها

وفيها عششت خفافيش

***

وادَوَّر في الكلام كله

على كلمه

حروفها رسْـمَها نبضي

ومن جوفي

مدادها من صميم حسي

ومن خوفي

بخاف حبي يضيع مني

وتدبل بعدها حروفي

***

وادَوَّر في الكلام كله

على كلمه

توفي للغرام حقه

وتحكيله على حالي

وانا وحدي ومش وياه

بدور وسط إحساسي

على حبي..

ومش بلقاه

كأنه تاه

ما بين زحمه من الأحاسيس

وافكر إني راح أنساه

ولكن في ظلام يأسي

يشاور من بعيد ضيه

وقلبي يدق..

ويرسم في السما فرحه..

على دمعه..

ومليون آه

وبعرف إني طول عمري

مانيش ناسي

أنا فاكر..

وبستنــــــاه

***

منتخب مصر...شكرا..

2010-01-31T12:40:00.000-08:00

بداية..ألف مبرووووووووووووك للمنتخب المصري الذي أسعد الملايين..

وأود أن أقول أنه رغم صعوبة المباراه ، وقلة الفرص ، والمناوشات السريعه من المنتخب الغاني ، كنت أجلس في تمام الاطمئنان إلى أن الكأس لنا ، ولا أدري لماذا ، فالطبيعي - بالنسبة لي - أن أكون في قمة القلق والإثاره مع كل كره ، اليوم لم يحدث ذلك ، شعرت بثقة طاغيه في لاعبينا ، ربما لا أبالغ لو قلت أنني من فرط الثقه قلّ عندي الشعور بحلاوة المباراه ، وبفرحة النصر ، وكأنني كنت أشاهد مبارة مسجله أعلم نتيجتها مسبقا..!!!

حين أفكر في ذلك ، أجد أنني لم أثق يوما بما هو مصري ، فموروث لدينا أن كل ما هو مصري فهو رديء (عقدة الخواجه) ، لا المصنوعات المصريه كمصنوعات "بلاد بره" ، ولا الطرق المصريه كطرق "بلاد بره" ، وحتى الديموقراطيه المصريه هي ديموقراطيه من نوع خاص وليست - ككل ما هو مصري - "زي بلاد بره"..!!

طوال عمري تعلمت - أو عُــلِّـــــمــْــتُ - أن أشك بكفاءتنا في أي شيء وكل شيء ، وفي أيام قليله تعلمت أن أثق ، بل أن أفرط في الثقه في شيء - إن جاز التعبير - مصري..!!

ربما لثقتهم بأنفسهم ، أجبرونا أن نثق بهم ، أو ربما لأنهم أهل لأن نثق بهم ، أهل لأن نحترمهم لأنهم فعلا محترمون ، مصلون ، يشكرون الله ويسجدون بعد كل فوز ، هم حقا من طراز فريد ، فلا أعلم فريقا يكون معسكره أشبه بالمعتكف ، صلاة ودعاء وقراءة قرآن ، وأخوة ومحبة وكأنهم إخوة أشقاء ، ليس المهم من يحرز ، ليس المهم من يسدد الكره ، ليس حتى مهمًا من يلعب ، المهم هو المصلحة العامه ، وأن تربح مصر في النهايه ، ولأنهم تغيروا تغيرت نظرتنا لهم ، لأنهم مختلفون اختلف شعورنا بهم..!!

في أزمة مصر والجزائر فكرت أكثر من مره أن أكتب ، لكني في كل مره كنت أجد حلقة مفقوده ، لم أقتنع بأن هذه هي النهاية ، فقد تعودنا النهايات السعيده ، وكنت موقنا أن العرض مازال مستمرا ، وأن نهاية مختلفه - تعجبني - سوف تأتي ، وها قد أتت..!!!

ربما لهذا فرحتنا عارمة هذه المره ، ربما شعرنا بأن كرامتنا ردت إلينا على طبق من ذهب ، بعد مباراة الجزائر ، لأول مره أشعر أني غير مهتم بالكأس ، المهم أننا هزمنا الجزائر ، والأهم أنهم هم أنفسهم أثبتوا لكل من شاهد المباراه أنهم فريق من الهمج ، يلعبون الكرة بقوانين المصارعة الحره ، وحين يجدون حكما يحكم المبارة بقوانينها الحقيقية يثورون ، ويسبون ، ويقولون بأن الحكم مرتش ٍ..!!!!

أخيرا ، البعض يجد أن كرة القدم لا تستحق كل هذا الإحتفال ، ولم تكن تستحق كل ما حدث في أزمة مباراة السودان مع الجزائر ، هي في النهاية مجرد لعبه ، لكنها بالنسبة للكثيرين - وأنا منهم - مصدر للمتعه ، للتسليه ، والأهم أنها تجعلني أزداد فخرا بأني مصري ، تجعلني أشعر أننا تفوقنا في شيء - أيا كان هذا الشيء - ، وتجعلني أثق في أن المصري وقت الشده يستطيع أن يصنع نجاحا مهما كانت الظروف ، كرة القدم المصريه الآن هي مثال ناجح لحسن الإداره ، والإيمان بالله ، والثقة بالنفس وبالقدره على صنع النجاح ، مثال للإلتزام ، والكفاح ، وبذل الجهد والعرق لأجل المصلحة العامة قبل الخاصه ، مثال للإخلاص في العمل من أجل نجاح جماعي ، مثال أتمنى أن يكتمل يوما في كل ما هو مصري ، حينها ستكون مصر أم الدنيا بحق..

لهذا ، منتخب مصر ، شكرا..

1,2,3,4......Vive l'Egypte

2010-01-28T14:34:00.000-08:00

مـــبـــــــــرووووووووك

لــــــمــــــــــــــــــــــــــــصـــــــــــــــــر..

أغـــــــــــــــــــــــــــــلــى

نــــــــــــــــــــــصـــــــــــــــــــر..

لمــــاذا؟!!

2009-12-10T02:54:00.001-08:00

لمـــاذا؟!!

لماذا إذا كنتُ وحدي بليل ٍ..

يطولُ المساءْ؟!!

وتمضي النجومُ..

وذا البدرُ يمسي أسيرَ البكاءْ؟!!

ويخبو الضياءْ؟!!

ولما أراكِ..

فيحلو اللقاءْ..

ببدر ٍ يغني..

ونجم ٍ ينوّرُ خدَّ السماءْ؟!!

لمـــاذا؟!!

لماذا إذا لم تكوني بقربي..

تصبحُ عندي جميعُ الأماني..

قربـًا إليكِ ودفئَ التقاءْ؟!!

وعندَ اللقاءِ أرى كلُّ حلمي..

تبسّمَ فيكِ وبعضَ الرّضاءْ؟!!

لمـــاذا؟!!

لماذا إذا حانَ وقتُ الفراق ِ..

تموتُ الحياة..

وأمضي بعمري ثقيلاً عليلاً..

كأني كهلٌ به ألفُ داءْ؟!!

وأشعرُ أنك قلبي..ونبضي..

وأن ليس لي غيرَ "أنت" دواءْ؟!!

لماذا أرى فيكِ كلَّ النساءْ؟!!

وكلٌ سواكِ فعندي سواءْ؟!!

لماذا إذا كنتِ يوماً بقربي..

تهونُ الحياة..

كأني بخلد ٍ بهِ ما أشاءْ؟؟!!

لمـــاذا؟!!

***

لمـــاذا؟!!

لماذا إذا ما التقيتكِ..

يسري بقلبي غزيرُ المشاعرْ..

وتسمو بنفسي جميعُ المعاني..

وتنسابُ مني الحروفُ ارتجالاً..

ويغدو خيالي خيالاً لشاعرْ؟!!!

وحينـًا أراكِ يضيعُ الكلام..!!

فأبهى حروفي..

ليست تبوحُ بما في السرائرْ..!!

وأشعرُ أني ما زلتُ طفلاً..

ويحتاج درسـًا..

ليعرفَ بالعشق ِ ألفـًا وباء..!!

وكيفَ بحب ٍ تبوحُ الحناجرْ..!!

لمـــاذا؟!!

لماذا أراكِ..

فيزدادُ حلمي بريقــًا ونوراً..

ويجتاحُ جسدي بعضُ ارتجافٍ..

يداعبني مثلَ ألعابِ ساحرْ؟!!!

لماذا تزيدُ الزهورُ ابتسامـًا؟!!

وبين السعادةِ ذا الطيرُ حائرْ؟!!

لماذا أرى الناسَ أصفى وأسمَى..

يشفـُّونَ نوراً نقاة الضمائرْ؟!!

لماذا عيوني ترى كلَّ شيءٍ..

نقيـًا جميلاً بهيَّ المناظرْ؟!!

كأني انتقلتُ لعصر ِ الجمال..

كأني بحلمي يقينـًا أسافرْ..!!!

لمـــاذا؟!!!

***

صباحك مبارك..!!

2009-11-06T18:28:00.000-08:00

صباحك "مبارك"..

يا حاضر وغايب

وماشي في حالك..

عشان "الحبايب"

ودافن شبابك..

صغير وشايب..!!

وشايل في قلبك..

همومك زكايب

وصابر وراضي..

بكل المصايب

عشان انت مصري

و"مصرك" في ضيقه

فلازم ينوبك..

من الهم نايب

ولازم عشانها..

تبيع عفش بيتك..

وشيء من ولادك..

وممكن مراتك..

عشان الضرايب..!!

مش انت اللي قاعد..

وواكل وشارب..

ونورها وهواها..

مبعتر وسايب؟!!

فلازم تحاسب..!!

وتعمل ده كله..

ولا تبقى عاجب..!!

***

صباحك "مبارك"

صباح "الجمال"

وتفضل يا مصري..

في قصة نضال

مفيش زي همك..

ولا بيت يلمك..

تجوع انت وامك..

مع ام العيال

هتركب كارته..

هتلبس جاكته..

عملت ابن حته..

وسيد الرجال

تعيش عيشه مره..

تموت ألف مره..

عملت ابن بره..

بغتره وعقال..!!

تقول مره ما في..

تعيش انت حافي..

مشيت جوه حيطك..

مشيت ع الحبال..!!

ضعيف زي ما انت..

وصوتك بيوطى..

وكلت الأونطه..

وبرضه يا مصري..

خلاصك محال..

وعيشة جنابك..

هتفضل عذابك..

عشان إنت دايما..

صباحك "مبارك"..!!

صباحك "جمال"..!!

عن الحب..!!

2009-11-01T10:27:00.000-08:00

لا أنسى أبدا تلك السعادة بعينيه لما قدر له أن يتكلم معها خمس دقائق ، جاءني بعدها يفيض سعاده ، به رجفة شديده ، أسمع دقات قلبه ، وأرى جسده يتراقص معها ، يحكي لي عنها كطفل صغير طار فرحا بلعبته الجديده ، لا أذكر أني في حياتي صادفت أحدا في سعادته وقتها ، وتعجبت كثيرا من حاله ، فكل هذه السعادة لأنه فقط تكلم معها خمس دقائق..!! ماذا إذا لو خطبها؟!! ماذا لو تزوجها؟!!
خطبها..وكانت سعادته أقل..وتزوجها..وكانت سعادته أقل بكثير..!!! لكنه مازال سعيدا ، وراضيا ، رغم أنه يعلم أن سعادته بالحب كانت أضعاف سعادته ببقاء حبيبه بجواره إلى الأبد..!!

قال لي :"ربما يرى البعض أن حبيبتي ليست جميله ، لكني عندما أكون معها لا أرى امرأة في الدنيا غيرها ، لا تستهويني أي نساء الدنيا ، ولا أجمل نساء الدنيا ، حبيبتي وحدها تكفيني"
أيقنت - وكنت أعلم - أن الحب غير مرتبط بالجمال ، ولا بالمال ، ولا حتى بشخص الحبيب وطباعه ، إنما يتعلق بشيء لا نعرفه ، يصهرهما معا ليكونا شيئا واحدا ، يتعلق بالراحة بالحبيب وللحبيب ومع الحبيب دون أي تفسير لذلك ، تعلق طفولي وحسب..فلو سألته :"لماذا هي بالذات؟" لقال بكل ثقة :"لا أعلم"...إنه الحب..الحب وحسب..!!

يقولون أن الزواج مقبرة الحب..ولم أقتنع بذلك يوما ، ربما ما يقتل الحب أشياء أخرى يعرفها هو جيدا ، لكنه يتهم الزواج ليظل هكذا يستمتع بالحب دون مسئولية يتحملها ، أو ليتخلص من مسئولية ثقل عليه حملها..!!

لم أقتنع بأن الزواج مقبرة الحب ، وأنا أرى حولي من أحب زوجته أكثر من خمسين عاما ، رغم مرضها ، رغم مشقته في رعايتها ، رغم أنها ما عادت جميله ، ما عادت أصلا من النساء ، مجرد عجوز شمطاء..يحبها..!!

لطالما اعتقدت أن الموت حزنا على الحبيب هو مجرد كلام روايات ، حتى عرفت أنه مات بعدها بيوم ، حكوا لي حينها كيف كان حبه لها ، وكيف كان ارتباطه الشديد بها ، ويبدوا أنه لم يحتمل أن تتركه وحده ، هو أصلا نسي كيف يكون وحده ، رحلت..فرحل..!!

آه منك يا باطنه.!!

2009-10-04T05:56:00.000-07:00

كيف السبيل؟؟

كيف السبيل وكلها..

من شرقها ولغربها..

كتب ثقال..!!

كيف السبيل وكلما..

فكرت كيف " ألمّها "..

أحسست أن الأمر..

ضرب من خيال..!!

جاوزت أميالا..

على صفحاتها

وظللت أياما..

أخاطب ودها

حتى مرضت من العنا..

وأصابني منها هزال..!!

مازلت أبحث في سطور كتابها..

ذاك العتي "الأخضر" الجبار

فأرى هنالك "حالة"..

ما كنت أعرف حلها..

فجوابها أمر محال..!!

وأظل أركض بين كل سطورها

فأرى هنالك صفحة..

تبدو كأن حروفها..

تفوق حبات الرمال..!!

ما زلت أجمع من هنا..

أو من هنا..

معلومة!!

أملا بأن آتي بها عند السؤال..!!

وتعبت حقا..

من ضخامة حجمها..

ولبثت أنظر..

بين كل فروعها..

هل بقي منها أي شيء؟!!

لا..

قد تلاشت..

قد نسيت..

وتبدد العلم "الغتيت"

ووجدتني..

بعد المشقة..

والتعثر..

والتبعثر..

والتخبط..

بين قيل..بين قال..

لم يبق شيئ في دماغي..

غير ألم أو زوال..!!!

ماذا أقول؟!!

ما عاد عندي ما يقال..!!

*****

ملحوظه:

1.للي مش في طب..الباطنه هي إحدى مواد كلية الطب..وأعتقد أنها من أكبر الأشياء التي رأيتها في حياتي..!!

2.الأخضر..هو أحد كتب مادة الباطنه..خطير جدا..يحتاج إلى مهارة فائقة في التعامل معه..وحذر شديد..و...

إلحقووووووووني..

الكتاب هيموتني يا معتز...تيت...تيت..تيت..

تــــاج مــن هــبــــه

2009-09-24T00:12:00.000-07:00

السلام عليكم ورحمة الله وبركاته

النهارده أنا جاي أجاوب تاج مررته ليا المدونه الرائعه هبه سيد صاحبة مدونة my life...my road to allah

ورغم إني حاسس إن التاج خاص شويه..أو بعنى أدق كان موجه ليها هي تحديدا..لكن هي قالتلي جاوب وخلاص..فهاجاوب وخلاص!!

1.هو إنت ليه مستفز؟!!

والله أنا لا مستفز ولا حاجه..بالعكس..أنا مسالم جدا لدرجة إن فيه ناس فاكره إني عمري ما بتضايق من حد ولا بزعق لحد ولا بانتقد حد نقد لاذع أو بطريقه تضايقه..لكن في الواقع أنا مبحبش أستفز حد مهما عمل..ولما بانتقد حد أو كده بيبقى بالحسنى علشان يرضى يسمعني ويعرف يستفيد من كلامي..

بالنسبه بأى لتصرفاتي عموما فهي مش مستفزه لأي حد خالص باستثناء بعض أصحابي اللي عاوزني أبقى مستفز!!!

2.بتضحك رغم إن ملامحك تدل على شخصيه قويه؟؟

باضحك آه..لكن ملامحي لا تدل بتاتا على شخصيه قويه..

3.إرتبط كام مره؟؟

جايز متصدقوش لو قلت ولا مره..

لكن هي دي الحقيقه

أصل أنا تقريبا كده مش فاضي أرتبط بحد

ومش عاوز أرتبط بحد أظلمه معايا

مستني بس الوقت المناسب

4.إيه اللي عجبك فيه؟؟

مقلنا مارتبطناش بحد

لكن من ناحية الإعجاب كان فيه إعجاب

كانت شخصيه على مستوى عالي جدا من الدين والخلق والثقافه

5.رتب أصحابك حسب المرتبه؟؟

كلهم ولادي..قصدي كلهم صحابي

هو طبعا بيبقى فيه ناس أقرب من ناس لكن مش هاقول طبعا :)

لكن أنا ممكن أقسم أصحابي بطريقه تانيه :

*اللي اتولدت لقيتهم صحابي ولسه معايا لغاية النهارده : أحمد عثمان - خالد - سامح - عمرو

*اللي عرفتهم في الكليه : محمد عبد الكريم - مدحت

*ناس عرفتهم من فتره قصيره جدا ورغم كده بقينا أصحاب : الجوهري طبعا - محمد السيد - لؤي

*فيه ناس بأى كان نفسي نبقى اصحاب لكن الظروف مسمحتش إننا نقرب من بعض ودول كتير أوي

وبجد كل الناس دي غاليين عليا جدا

6.نفسك تبقى إيه بالمستقبل؟؟

دكــــــــتور..

واحد في طب هيبقى إيه يعني

لكن أنا نفسي أبقى دكتور زي والدي الله يرحمه

7.أكتر المدونات اللي بتعجبك؟؟

كتير جدا

هتلاقوا لينكاتهم في السايد بار

8.الشغل أفضل أم البيت؟؟

أنا هاتجوز وأقعد في البيت

إيه السؤال ده

طبعا الشغل

والا يعني هابقى أسيب مراتي تصرف عليا

9.بتحب حد؟؟

بحب كل الناس :)

لكن حب غرام يعني..حاليا لأ

10.إيه رأيك في والدك؟؟

والدي - الله يرحمه - كان إنسان رائع بكل المقاييس

كان ناجح في عمله جدا

دكتور شاطر بجد

كان خيّر إلى أبعد الحدود

وكل الناس اللي عرفته حبته واحترمته

كان حنين جدا

أنا كنت كاتب بوست عنه قبل وفاته بفتره بسيطه

هتلاقوه هنا

"هذا أبي"

11.إيه رأيك في نفسك؟؟

مش عارف والله

مهو يا ريت الواحد كان يقدر يقيم نفسه

بيتهيألي كنا هنبقى أحسن من كده بكتير

أنا هاسيب الجوهري يقول رأيه فيا

يلا سلام

أبتـــــــــــــاه..

2009-08-07T15:29:00.000-07:00

أبتــــاه..
عام ونصف وأنت لست هنا
أذكرك..
أذكرك بعد كل صلاة..فأدعو لك
أذكرك حين أقرؤ القرآن..
فأجد صوتي من صوتك
أذكرك حين أذهب لأصلي الفجر..
فنبحث عن صاحب الخشوع والصوت الحسن..
فلا نجدك
أفتقدك..
حكما بيني وبين إخوتي
حين يحيرني أمر ما..
حين يغلب أحدنا النوم..
ويفوت ميعاده
حين نجتمع كلنا إلا أنت
وحتى حين ننسى أن نغلق باب البيت جيدا
أفتقدك..
في كل ركن..
في كل وقت..
في كل شيء حولي..

***

أبتـــاه..
بعدك..
ما عاد الفرح كما كان
ما ضحكنا من القلب
تبدد دفئ البيت
فقدنا حلاوة السمر
لم يكن يحلو إلا بك..
بعدك..
تغير طعم الدنيا
وما عدت أعلم
ألكون تغير؟!!!
أم تغير إحساسنا به من بعدك؟!!!

***

أبتـــاه..
والله والله..
فقدت ذلك الإحساس بالأمان منذ رحيلك
لطالما أحسسته وأنت معي..
ولطالما تعجبت منه..
فأنا لم أخط في الدنيا إلا القليل..
لم يبن لي من مستقبلي أي شيء..
الآن عرفت السر..
إنه أنت!!

***

أبتــــــاه..
الليلة كانت خطبة أحد أصدقائي..
وفكرت
من سآخذ معي يوم خطبتي؟!!
من سيجيد الحديث عني مثلك؟!!
من في الدنيا يصلح أن يقوم مقامك؟!!
والله يا أبت لا أحد..
فإنه لا يوجد في الدنيا مثلك..

***

أبتـــاه..
الآن أغبط كل من له أب يرعاه..
وأدعو أن يطيل الله له في عمره..
وأقول :"ليته يعلم!"
ليته يعلم أن أباه ظهره وسنده..
وطريقه إلى الجنه..
ليته يعلم أنه متى فقده ندم..
على كل لحظة لم يرضه فيها..
وكل مرة تأفف منه..
أو حنق عليه..
أو كل برعايته..
ليته يعلم أن الدنيا - كل الدنيا- لا تساوي أن يحيا مطمئنا..
أن يحيا واثقا بأن هناك من يرعاه..
يحميه..
يصحح أخطاءه..
بل..ويدفع ثمنها..

***

أبتـــاه..
مهما تحلو الحياة فهي بدونك مره..
ومهما قويت فإني ضعيف دونك..
ومهما علا شأني ينقصني الاستناد عليك..
ومهما بلغت حكمتي أحتاج سديد رأيك..
أبتــــــــــــــاه..
كل شيء - مهما اكتمل - ينقصه أنت..

إندماج!!

2009-07-30T21:47:00.000-07:00

يبدو أن الأمور لا تسير دائما كما نريد ، ويبدو أن الخطط غير المدروسة جيدا - أو ربما المدروسه - كثيرا ما تئول للفشل ، ربما أن حماسة المرء تضعف في منتصف الطريق ، أو ربما تخبو تماما مع كل ما يواجهها من عثرات ومصاعب ، فتجدك في النهاية تترك أمرا قد بدأته ، أو تهمل أمرا كثيرا ما شغلك واهتممت به...

المهم..

جلكم يعلم أن لي مدونتين منذ زمن بعيد (كام شهر كده) ، جلكم أيضا يعلم أني مهمل تمام الإهمال في كلتيهما منذ نفس الزمن البعيد ، أذكر أن آخر موضوع كتبته في إحداهما كان منذ حوالي أربع شهور ، إضافة إلى تاج من هنا أو تاج من هناك لحفظ ماء الوجه ، وإيمانا مني بأن المدونه التي لا تستخدم تضمر!!

ولما بحثت أسباب إهمالي لمدونتي ، وجدت أهمها أن لاوقت لدي لأتابعهما ولو كل أسبوع مره ، أيضا لدي ما يشغلني كثيرا ، وقتا عقلا ، ويضعني في حالة لا أستطيع معها أن أمسك قلما وأكتب..اللهم إلا كل حين وحين!!

لذا قررت - بعد مشاورات كثيره - أن أدمج المدونتين معا ، ليكونا مدونة واحده ، عسى أن أستطيع - وتستطيعون أيضا - متابعتها..

وذلك لمن يهمه الأمر

سلام

تااااج تاني..ربنا يزيد ويبارك..

2009-06-26T17:20:00.000-07:00

ولتاني مره على التوازي يجيلي تاج..شكلي كده بقيت فاتح المدونه عشان ال..ال.. (هو جمع تاج إيه).. آه ..بقول شكلي بقيت فاتح علشان التاجز (إنجليزي..أبوسترف إس)..

المهم التاج جايلي من سول صاحبة المدونه الرائعه "voice of mine".

وأولا عاوز أعتذر جدا على تأخري جدا في إجابة التاج ، لكن ظروف والله (على فكره هي نفس الظروف اللي أخرت الجوهري برضه) ، وثانيا عاوز أشكر سول على تمرير التاج ، وثالثا عاوز أقولها ربنا يسامحك علشان التاج بجد تقيل..تقيل يعني..

نبتدي بأى نجاوب

من أنت؟

شادي ، طالب طب ، بني آدم عادي جدا ، من عامة الشعب يعني

وما الذي تفعله هنا؟

بجاوب التاج اللي سول باعتاهولي

إسرائيل تقصف كل جنوب ممكن بحثا عنك ، أي شمال ستقصد؟

أقصد إيه؟؟ ده أنا كل حياتي شمال ، شمال أفريقيا ، وشمال مصر ، وتاني بيت على إيدك الشمال وانت داخل شارعنا :)

وبعدين نحن نختلف عن الآخرين ، إحنا مسايسين أمورنا ، وبنسمع الكلام ، وبقالنا سنين بنزق عجلة السلام لما نفسنا انقطع ، يبقى إن شاء الله مش هيضربوا جنوبنا إلا لما يخلصوا كل جنوب آخر ، عملية وقت مش أكتر..

أنت مكلف بحذف حرف من حروف اللغه العربيه ، أيها ستختار ولماذا؟

مينفعش أحذف أي حرف ، أصلي لو حذفت أي حرف مش هاعرف أكمل البوست ده ، وانتوا مش هتفهموا أي حاجه أنا هاكتبها..

لو قدر لك أن تدخل السجن فما هي القضيه التي تتمنى أن تدخل بها إليه؟

ربنا ما يكتبها علينا ، بس يعني لو هادخل يبقى أدخل بحاجه محترمه ، قضيه سياسيه مثلا (ربنا يجعل كلامنا خفيف عليهم)

بالمناسبه..منذ متى اكتشفت نفسك؟

لسه والله ، هادور ولما أكتشفها هاقولكم ، ولو إن نادر جدا اللي بيكتشف نفسه بالظبط

على مفترق طريق الإفتتان ، اليمنى تقول : "إلى حلمك" واليسرى تقول : "إلى ما لم يحلم به البشر" ،أي الطرق ستسلك؟

أولا أنا مش شايف إن ده افتتان ، أنا شايف إن (إلى حلمك) طموح مشروع طالما إن الحلم حلال وشرعي ، لكن "إلى ما لم يحلم به البشر" هبل أو طمع ، وبالتالي هاختار "إلى حلمك" ، وربنا يوفقني وأوصل ، ولو موصلتش كفاني شرف المحاوله..

نحن لا نعيش حياتنا بل نتعلم فيها كيف نعيش ما تعليقك؟

جايز برضه

بجمله واحده فقط إكتب تعريفا لكل كلمه من الكلمات الآتيه:

الوطن

أي مكان بحس فيه بالأمان ، الدفء ، الألفه ، الإنتماء

الأم

الوحيده اللي بتحبك زي ما انت كده ، ومهما كنت وحش

الليل

سكووون ، قد يشتعل دفئا وحب ، وقد يقتلك فيه البرد والخوف والوحده

الحب

بيتهيألي الحب ملوش وصف معين ، جايز يكون إنك تشتاق لحبيبك حتى وهو في حضنك ، إنك متشوفش في الدنيا غيره ، إنك تبقى في عز حزنك وتنساه بابتسامة منه ، أو إنك تبقى في قمة السعاده وتنساها لمجرد إن حبيبك زعلان..و إنك ترضى بدون تردد تضحي بحياتك عشانه ، وجايز يكون عذاب ملوش دوا..

أقولكم لما أجرب هابقى أوصفهولكم بالظبط

أمريكا

فرعون

المرأه

لا بحبك ولا باقدر على بعدك ، شر لا بد منه ، مش كلهم بس معظمهم :)

الصمت

حاله من الاكلام

الإنترنت

ضروره تستحيل الحياه بدونها ، على الأقل بالنسبة لي

إختر منصبا واتخذ قرارا؟

رئيس الجمهوريه ، إقالة وزير التربيه و التعليم ، الراجل ده خنقنا بصراحه

قيس ، عنتره ، جميل ، هم الذين يقولون شعرا ، وليلى وعبله وعزه "صموت" لماذا هذا التغييب للمرأه؟

ده كان زمان ، دلوقتي صوتهم قد كده ، وعلى رأي مش عارف مين البنت بقت زي الولد

"أن تكون مطلوبا لارتكابك جريمه ، خير لك من ألا تكون مطلوبا مطلقا"
هل تتفق مع هذه العباره؟ علل.

لأ ، هو يعني عشان أكون مطلوب أبقى مجرم ، يا سيدي خليني قاعد في بيتنا أحسن

إلى أين تمضي كلمات الحب بعد أن نقولها؟

إلى قلب الحبيب ، وبتستقر إلى الأبد

هل تجد علاقه بشكل أو بآخر بين المرأه وقطاع الطرق؟

طبعا ، حتى اسألوا أي واحد متجوز

هذا فراق بيني وبينك ، متى ولمن تقولها؟

لأي خاين

كيف هو غدا؟

لا يعلم الغيب إلا الله

تمرر التاج ده لمين؟؟

والله التاج رخم شويه ، ومش عاوز حد يدعي عليا

اللي عاوز ياخد التاج يتفضل (وأنا متأكد إن محدش هيعوز)

سلام

تااااااااااااااج

2009-05-26T12:45:00.000-07:00

أخييييييييرا لقيت حاجه أكتبها

هو في الواقع أنا لسه ملقيتش لكن جالي تاج من د.هابي صاحبة مدونة على بالي

والله التاج جه في وقته

لأنه هيخلي الواحد يفضفض شويه بدل الكبت اللي هو فيه

وكمان أهو بوست والسلام بدل ما المدونه بتنش والوحي منقطع تماما

كفايه رغي أى ونرد ع التاج

اسمك ؟؟

شادي

المشهور بيه وسط صحابك؟؟

برضه شادي

سنك؟؟

23 سنه و8 شهور و3 أيام

مجال الدراسه؟؟

طب بشري :(

اسم مدونتك؟؟

والله هما مدونتين مش واحده

سلوا قلمي و مجرد كلام

قال يعني من كتر الموضوعات والأفكار عملت مدونتين

أو زي ما تقولوا كده أبو بلاش كتر منه

صورتك الرمزيه بتعبر عن ايه؟؟

هي صورة prince of persia أو أمير بلاد فارس

هو طبعا بطل لعبة الكمبيوتر المشهوره

وطبعا عاملينه طيب وابن حلال وشجاع وبيحب الناس وبيدافع عن الحق وأمير

يعني راجل فول أوبشنز أي واحده تتمناه

لكن أنا اختياري ليه في الحقيقه علشان إعجابي الشديد بعبقرية صناع الشخصيه وصناع اللعبه برضه

أكيد اللي لعب اللعبه دي فاهمني

فكرت تقفل المدونه؟؟

إطلاقا

حتى لو مش لاقي حاجه أكتبها

وحتى لو مبقاش حد يتابعها خالص

ايه رد فعلك لو حد قل أدبه عليك فى تعليق ؟؟؟

عمرها ما حصلت

بس لو حصل هامسح التعليق وخلاص

مش هنزل بأى لمستوى الخناق وأروح أشتمه في المدونه بتاعته وكده

أسوء مدونه؟؟

مدونه قديمه كده اتقفلت

كانت صاحبتها بتكتب كلام خارج شويه واللي ينتقدها كانت بتهزأه!!!!

هيحصل ايه لايميلك بعد ما تموت؟؟

طبعا الشركه هتلغيه عشان تفضي المساحه لحد غيري

مهو الحي أبقى من الميت

اديت الباسوورد لحد قبل كده؟؟

لأ

السفر بالنسبه لك؟؟

متعه كبيره

السفر في حد ذاته

مش مهم المكان ومش مهم طبيعة السفر

المود بتاعك ايه؟؟

والله أنا متقلب المزاج

يعني ساعات ساعات

بس الغالب إني بابقى قلقان بالذات أيام الدراسه

في الأجازات (ده قبل الكليه يعني) بابقى مفرفش جدا وآخر روقان

بتعمل ايه فى اوقات فراغك؟؟

غالبا باقضيه مع ماما واخواتي

عندنا استعداد نرغي 48 ساعه في اليوم

وممكن ع النت أو مع أصحابي

بس غالبا مبيبقاش فيه وقت فراغ

يعني آخر مره شفت فيها اصحابي اللي من بره الكليه كان من أكتر من شهر!!!

الاكله المفضله؟؟

السمك

الصفات اللى خدتها من والدك؟؟

حاجات كتير جدا

قرايبي بيقولوا إني صوره طبق الأصل منه

الصفات اللى خدنها من والدتك؟؟

طريقة تفكيرها وتحليلها لأي موقف أو أي شخصيه

غالبا بيكون رأينا زي بعض بالظبط

اكتر 6 حاجات بتكرهم؟؟

الكدب

الغش

الاستغلال أو اللي بعض الناس بيسموه الاستنطاع :)

الخيانه

المشاكل

امتحانات الشفوي :)

اكتر 6 حاجات بتحيها؟؟

عيلتي

أصحابي

السواقه

الليل

الشعر

السمك :)

شخصيتك نوعها ايه؟؟

مش عارف

لماذا دخلت التدوين من الاساس؟؟

من الأساس كان علشان الشعر

علشان كده لما بدأت أكتب مقالات عملت المدونه دي لأني محبيتش إن المدونه الأساسيه يكون فيها حاجه غير الشعر

اهميه التعليقات بالنسبه لك ايه؟؟

اهم من البوست نفسه

باستناها جدا وبفرح بيها أوي (يلا علقوا بأى)

احلى بوست كتبته ؟؟ ضع اللينك ثم اذكر السبب

في المدونه دي البوست اللي قبل التاج "خالتي" وبوست "زمان وأنا صغير"

وفي المدونه التانيه بوست "إذا فارحل" وبوست "شد اللحاف"

خالتي..ده أقل تقدير ليها إن الناس تعرف قصتها وتدعيلها بالرحمه

زمان وأنا صغير..كل ما باقراه باحس براحه كده بيرجعني عشرين سنه ورا

افضل مدونه قرأتها؟؟

كتير أوي أوي طبعا اللي في قائمة المدونات في السايد بار

افضل بوست قرأته؟؟

إغضب - إذا شئت - أو مت!! للمدون الرائع جدا خبيب

الشغل بالنسبه لك؟؟

لحد دلوقتي حلم

لأني ساعتها هاكون خلصت من كابوس اسمه الحركي كلية الطب!!

الانترنت بالنسبه لك؟؟

ضروره تستحيل الحياة بدونها

تمرر التاج ده لمين؟؟

للجوهري عشان ده تار بايت

وهبه سيد

وسهر

***

حتى يعود الرجال!!!

2009-04-12T07:42:00.000-07:00

قالوا بخبث:

"هل تريدون السلام؟!!"

قلنا بفخر الأغبياء:

"نحن صناع السلام"

صرنا كطير أحمق..

يجري وراء لقيمة..

قد علقوها - عابثين - بذيله!!

أتراه يوما قد يصل؟!!

أم جريه هذا انهزام؟!!

أعهدت أحدا يا أخي..

قد يدرك الأوهام؟!!

ها قد أضعنا عمرنا..

ونحن نبحث بينهم..

عن ذلك المدعو "السلام"

وكل يوم بيننا..

طفل يموت

عرض بعقر الدار يهتك

ثم تنهدم البيوت

شيخ يقاسي دمعه

يبدو لناظره أساه..

كأنه يبكي هنا..

من ألف عام!!

ونحن نحترف الكلام!!!

***

غارت كرامتنا قليلا..

ثم قالت:

"لو أنكم صرتم نساء

همكم دفء البيوت

مع التضاحك والمزاح!!

أو أنكم حتى بكيتم..

فاكتفيتم..

بالبكاء أو النواح!!!

أو بتنديد جبان..

في مساء أو صباح!!

أو حزنتم جم حزن

ثم قلتم:

"لا كما تهوى السفينة..

دائما تأتي الرياح"

لو نسيتم..

كيف كان النصر يوما..

بالسيوف وبالرماح

لو سواعدكم..

تكل الآن من حمل السلاح!!

فالله أكبر

إنها نعم السلاح

إيمانكم..

قرآنكم..

ويقينكم أقوى سلاح

إن فقدتم كل ذلك..

قاطعوهم!!!

نفطكم أيضا سلاح"

***

قالوا لصوت الحق:

"كفاك يا هذا عناد

كفاك هتفا بالجموع

ألست تدري أننا..

إن منعنا النفط يوما..

قد نجوع؟!!!

وقد يحاصرنا كساد!!!

من أين نأتي حينها..

بلباسنا؟!!

عرباتنا؟!!

شتى لذائذ عيشنا؟!!

وأنت تعلم أننا..

ما عاد فينا فارس..

يمتطي ظهر الجياد

أو يعيش بخيمة

أو إن أراد الرزق يوما

جاب أطراف البلاد

أنت تعلم أننا..

قد نسينا كيف نزرع..

كيف يا هذا بيوم..

سوف ننتظر الحصاد؟!!

قد نسينا كيف نبني..

كيف نغزل..

كيف نعمل..

قد نسينا الصيد حتى!!

كل شيء عندنا..

ينقضي دون اجتهاد!!"

***

قال:"ما أنتم رجال..

علموكم منذ دهر..

كيف تطئون الكرامة..

بالنعال!!!

كيف تقتنعون أنّ..

النصر ضرب من خيال

كيف تصبح أرضكم..

قبرا لكم

ودماؤكم..

صارت كماء البحر..

أو حب الرمال!!

فابقو إذا..

حتى يعود لأرضنا..

عهد الرجال!!!"

***

دكــــــــتـــــــور!!

2009-03-28T06:12:00.000-07:00

دكــــــــتـــــــور!!

باسرح كتير وقليل

واقول يا عيني يا ليل

كان إيه يا رب رماني..

ع الغلب ده والويل؟!!!

أيوه افتكرت خلاص..

الفرحه والتهليل..

وشهادة الثانويه

مجموع مكانش هزيل

ده عشان يكمل ميه

فاضله جوز زغاليل!!!

***

واتلموا أهلي عليا

قالولي يا دكتور

وانا اقول طب اهدوا شويه

بلاش نعيش الدور

يقولوا لأ هنعيشه

ده يوم هنا وسرور

بصيت لقيتني هناك

ووقعت في المحظور

من غير ما أفكر حتى

ولا أستخير وأشور

***

ولقيتني شايل بالطو

ماشي كأني وزير

طاير كده في العلالي

أحلى من العصافير

دخلت أنا م الباب

لقيت هناك طوابير

باقول في إيه يا ترى

لعل كل ده خير

قالولي دول دفعتك

داخلين لابو الدكاتير

الحق بأى محاضرتك

زاحم مع الطوابير

قلت مش مشكله

الزحمه عادي كتير

بس المهم إني أقعد

لو حتى صف أخير

وطبعا كنت بحلم

ودي آخرة التأخير

وبرضه قلت هاصبر

ده الصبر أجره كبير

وقلت هاحاول أفهم

واملى الدماغ تفاكير

والله ما فهمت حاجه

ده كلام ولا الأساطير

***

ومر أول يوم

وحزنت أنا وبكيت

وعرفت م اللي جرى

إني خلاص طبيت

طب أعمل إيه يا ترى

دورت أنا ولفيت

قالولي تاخد درس

وتبقى واد فحيت

سألت ع التكاليف

قالوا يادوب فتافيت

دول كلهم كام ألف

والأمر يا ابني بسيط

تنحت أنا وبرقت

قالولي : ليه اتخضيت

ده لسه فيه الكتب

وييجي ألفين شيت

والزحمه في المشرحه

ولابد تبقى غتيت

وتعيش هنا بصحتك

وتطنش الإتيكيت

وعلشان تشوف جثتك

لازم تكون عفريت

ع الأرض أنا طبيت

***

وفقت بعد يومين

وقلت لازم أنا

أشوف طريقي منين

فضلت في الغلب ده

على حالي ست سنين

كانت خلاص صحتي

دخلت على الستين

والسمع راح والنظر

والقلب والشرايين

والضغط عندي علي

أصبح تملي متين(200)

وبصيت لقيت صحبتي

وشلة الخايبين

ارتاحوا واتجوزوا

بدل الجوازه اتنين

***

وبعد طول مشوار

وعذاب وصبر غريب

طلعت م الكليه

والإسم إني طبيب

باقبضلي كام ملطوش

ميعمروش الجيب

ميأكلوش عيش حاف

مش لحمه والا زبيب

فكرت اشغل مخي

وافلح واكون كسيب

وقلت ألعب كوره

لقيتني مش لعيب

طب ولاّ أركب تاكسي

أو حتى أبيع يانصيب

لقيت الناس لاموني

قالولي لأ كده عيب

بأى بعد كل علامك

تروح كده وتخيب

طب أعمل إيه دلوني

ومنين يا خلق أجيب

عشان أعيش مرتاح

من غير ما يبقى ده عيب

وافضل كده محتار

واتعب من الأفكار

وارجع واقول ده نصيب

لو مهما أعمل إيه

لازم النصيب هيصيب

***

خــالـتـي

2009-03-23T19:27:00.000-07:00

تأخرت كثيرا في نشر هذا المقال ، فقد كنت كلما كتبته وهممت بنشره وجدت أن كلماتي ضئيلة جدا ، ولا توفيها حقها..ورغم أن الكلمات هذه المرة أيضا لاتوفيها حقها ، إلا أنني قررت نشرها ، فبالنهاية لا تحتاج خالتي إلى كلماتي ، ولا إلى أضعافها..

هي لم تتعلم ، فوقتها لم يكن ببلدتنا مدرسة تذهب إليها ، ولم يكن لدى جدي - رحمه الله - المال ولا الثقافه ليدفع بها إلى مدرسة المدينه ، كانوا يرون أن تعليم الفتاة لا طائل منه ، فدورها ـ برأيهم ـ لا يتعدى أن تكون زوجة وأما..لا أكثر.

كانت الوحيده من بين أخواتها التي تساعد والدها في عمله بالزراعه ، يبدو أنها أرادت أن تكون رجلا له يعينه على عمله ويشد من أزره إذ لم يرزقه الله بالذكور.

زارهم خالها ذات يوم وقال لوالدتها : "أنا عاوز أجوز فاطمه لعلي" ، ولأن هذا الخال كان كبير العائلة وقتها لم يستطع أحد أن يخالف أمره ، رغم أن عليـًّا هذا لم يكن يصلح زوجا بحال من الأحوال ، وجاهد جدي جهادا مريرا لأن يمنع هذه الزيجه ، كان يقول :"هو ده ينفع يفتح بيت ، ده بيمشي في البلد قالع راسه!!"..كان كشف الرأس حينها ضربا من مخالفة التقاليد ، والخروج عن المألوف ، والاستهتار..تماما مثل "البنطلون الساقط" ، والسلسله ، والحضاضه في زماننا!!

تمت الزيجة على أي حال..وبدأت المأساه..انتقلت خالتي إلى بيت زوجها الذي هو بيت عائلته لتعيش مع حماتها التي كانت امرأة غليظة القلب ، قاسية إلى أبعد الحدود ، لا تملك رحمة أو شفقة حتى بأبنائها ، فما بالنا بخالتي؟!!! يكفي أن أقول أنها كانت تبخل على خالتي حتى بالطعام ، ولولا أن بيت أمها كان قريبا منها لماتت خالتي جوعا .

أما الزوج ، فقد ورث غلظة أمه وقسوتها ، كان كثيرا ما يعتدي على خالتي بالضرب ، كان دائما ما يسبها ، كان في أحسن أحواله يناديها قائلا : "يا بت" ، لا أذكر أني سمعته مرة يناديها باسمها..فما بالنا بكلمة حسنة أو حتى ابتسامه..بالطبع هذا كان ضربا من الخيال ، أو الجنون!!!

لم يعطها يوما جنيها ، لم يشتر لها أبدا جلبابا أو حتى إيشاربا ، كانت تشتري ما تحتاجه من مال أعطاه لها أبوها ، أو أبناء عمومتها في الأعياد و "المواسم" ، أو حتى دون مناسبة لما يعلمون من بخل زوجها عليها.

ليت الأمر توقف عند ذلك ، بل كان هذا الزوج - رغم كل صبرها عليه - يخونها مرار وتكرارا ، أذكر أنها مرة من المرات القليلة التي حكت فيها شيئا عنه ، حكت لي عن خيانته المتكررة لها..كثيرا ما أمسكت به يخونها في "الغيط" وحتى في البيت ، حكت لي عن تلك المرأة التي جاء بها إلى البيت ، وباتت معهما في غرفة نومهما ، بالطبع لم تنم خالتي ليلتها ، ظلت طوال الليل تراقبه لكي لا يفعل شيئا ، وهو يكاد يموت غيظا ، ضحكت كثيرا حينها ، وضحكت هي معي ، يبدو حقا أن شر البلية ما يضحك!!

ربما يتساءل البعض الآن عن سر احتمالها له..أذكر ذات مره أنه ضربها ضربا مبرحا ، حتى أن جيرانها جاءوا بها إلى بيت أبيها يحملونها حملا ، فأخذها أبي - رحمه الله - إلى المستشفى لعمل تقرير طبي بحالتها ، وأخذ حقها ثم طلاقها منه ، حينها قالت بشيء من حكمة الكبار رغم صغر سنها : " لأ يابا ، هو عاوز كده عشان ميصرفش ع العيال ، والله ما حد هيربي عياله غيره "...لملمت جراحها وأطفالها وعادت بهم إلى بيت زوجها أو بتعبير أدق إلى السجن!!

وبعد كل ذلك ، ذهب وتزوج بامرأة أخرى ، وكان فصلا جديدا من فصول روايتها الباكيه ، وبالطبع تعلمون ما يحدث للزوجة الأولى عندما تأتي الثانيه!!! يكفي أنه كان يتعمد أن يدلل زوجته الجديده ويداعبها ويلاطفها أمامها وهو بخل عليها حتى بأن يناديها باسمها!!! كان يغرق الأخرى بالهدايا ، والملابس الجديده ، والعطور كل يوم وهو لم يفكر يوما أن يشتري لخالتي ولو حذاء!!!

لكن هذه المرة أبى الله إلا أن يخلص خالتي من عذابها ، فمرضت الزوجة الثانية بمرض عقلي ، ولأن الزوج كان "قليل الأصل"..لم يحتملها وبعث بها إلى بيت أهلها ، فهو لم تعد له بها حاجة طالما مرضـت!!

المشكلة أنها كانت قد أنجبت ولدا قبل مرضها ، وفي ظل ظروفها ما عادت قادرة على رعايته ، هي أصلا ما عادت قادرة على رعاية نفسها فكيف ترعى ولدها؟!!! ربما لن تصدقوني لو قلت لكم أن خالتي تكفلت برعايته وتربيته بين أبنائها كواحد منهم بل وأفضل..رغم كل ما فعلته أمه معها..وقفت بجانبه حتى صار متفوقا بدراسته ، والتحق بكلية الطب التي لم يصل إليها أي من إخوته ، لن أنسى أبدا تلك الفرحة بعينيها لما ظهرت نتيجة الثانوية العامه وكان من المتفوقين ، كنت أتعجب من أمرها كثيرا ، كيف تفرح هكذا وهو ابن "ضرتها"؟!!! وقد وصل إلى مكانة لم يصل إليها أبناؤها..أليس الأولى أن تشعر بالضيق لذلك؟!!أي تسامح هذا؟!! وأي رحمة تلك؟!!

وما أن التحق بالجامعه..وتحديدا يوم عيد الأضحى الماضي..توفيت خالتي ، سبحان الله ، وكأنها هكذا قد أتمت ما خلقت لأجله ، توفيت بعد ثلاثين عاما من الشقاء ، ثلاثين عاما لا أذكر أني رأيتها يوما سعيده ، ورغم ذلك كانت دائما ما تضحك ، دائما راضيه ، دائما تقول ملأ الفيه : "الحمد لله"..

لطالما اعتقدت أن الحياة حلو ومر ، هناء وشقاء ، بل وكنت أعتقد أن الهناء فيها أكثر من الشقاء ، وأن الحلو أكثر من المر ، ولما تدبرت حياة خالتي ، وجدت أنه من بيننا من يعيشون الحياة مر ومر ، شقاء وشقاء..

توفيت خالتي يوم عيد ، كان هذا أسوأ أعيادنا ، وكان عزائي يقيني بأنه أفضل أعيادها وأسعدها على الإطلاق ، فقد عاشت - رحمها الله - راضية محتسبه ، و"إنما يوفى الصابرون أجرهم بغير حساب".

ما أدراكِ؟!!!

2009-02-27T19:42:00.000-08:00

ما أدراكِ؟!!
ردا على د/هابي "دعني أرحل"

وما أدراكِ..

أنك ما عدت أميرتي..

و ملاكي؟!!!

ما أدراكِ..

أنك إن رحلتِ

أنني سأكون صلبا؟!!!

أو أنني أصلا سأكون؟!!!

ما أدراكِ أني..

لن أصير إلى الجنون؟!!!

ما أدراكِ..

أنك إن رحلتِ..

سأجد ما أحيا لأجله؟!!!

وما أدراكِ..

أني سوف أنجو..

- في رحيلك - من هلاكي؟!!!

...

حبيبتي..

إقبليني إذا..

مجرد ظل ٍ لكِ..

لا يتحرك إلا خلفك..

لا يشغلك النظر إليه..

بل لا تشعرين بوجوده..

ولتجوبي الطرق وحدك..

ولتحتسي الشاي وحدك..

لتفعلي ما تشائين وحدك..

فأنا لن أسمح أبدا..

أن يبدوَ طيفيَ في عينيكِ..

أو أن أهمس في أذنيكِ..

لن أحلم يوماً..

بشفقةٍ علي..

أو نظرةٍ إلي..

أو أي وعود..

لن أجرؤ يوما..

أن أعاتبكِ..

أو أحملك أي ذنب..

فما عهدتك تذنبين..

لن أطمح يوما..

أن أكون غير ما تريدين..

أو أن أتخطى مكاني..

خلفك..

وربما حينها..

تشتاقين إلي..

تبكين علي..

يؤلمك غيابي..

في وجودي!!!

فتنظرين خلفك..

وتأخذين بيدي إلى جوارك..

إلى الحياه..

أو ربما..

لا تلتفتين إلي أبدا..

فأظل - راضيا - ظلا لكِ..

تاااااااااج..الله يسامحك يا جوهري

2009-01-19T20:39:00.000-08:00

بسم الله نبدأ

ده تاج مرره ليا الزميل المدون المحترم /محمد الجوهري(حفظه الله ورعاه)

ورغم إنه تاج رزل حبتين وتدبيسه لكن هنجاوب أمرنا لله

السؤال الأول:إذكر ستة أسرار يكتشفها من يقابلك لأول مره؟؟

طب ولما هي أسرار ، اللي بيقابلني أول مره هيكتشفها إزاي؟!!

عموما الناس اللي عرفتني في الفتره الأخيره ، قالوا إنهم من أول مره حسوا إني:

طيب

مبعرفش أكدب (خيبه يعني وبتفقس على طول)

خجول زياده عن اللازم

ساعات بقول كلام مش المفروض أقوله (تقريبا قصدهم إني ساعات بابقى مدب)...رغم إني شايف إني صريح مش مدب بس هما أصدق طبعا لأن الواحد ميعرفش يحكم على نفسه

مش سهل أقيم علاقه مع حد وغالبا باستنى الحد ده لما يبدأ هو العلاقه (شوية غباء اجتماعي كده على ما قسم)

تسريحة شعري قديمه شويه!!!!ولبسي كلاسيك شويه!!!

السؤال الثاني:سبع حاجات نفسك تعملهم؟؟

.ألتزم دينيا شويه..حاسس إني مقصر

.نفسي أبني جامع

.ألتزم في دراستي أكتر من كده وأطلع دكتور شاطر ينفع الناس بجد

.أتزوج واحده بنت حلال وتكون زوجه صالحه بمعنى الكلمه

. أشتري عربيه بي إم دبليو الفئه الخامسه!!!

. أخش أي سباق سيارات حاسس إن دي الحاجه الوحيده اللي أنا فالح فيها

.نفسي آخد دورة تنميه بشريه في مهارات الإتصال يمكن أعرف أعامل الناس أحسن من كده وأكون صداقات جديده بسهوله

السؤال الثالث: سبع حاجات معرفتش تعملهم؟؟

أكيد طبعا السبع حاجات اللي فوق اللي باتمنى أعملهم وكمان :

- عمري ما عرفت أواظب على القراءه..بازهق بسرعه

- ماعرفتش أطول كمان خمسه سم

- مش عارف أخس خمسه كيلو بس

- مش عارف أواظب على لعب أي رياضه (بقالي خمس سنين بحاول وكل مره بابطل)

-لحد دلوقتي حاسس إني ماعرفتش أكون على قدر احترام الناس ليا..بمعنى إني ماعرفتش أكون الشخص اللي عيلتي بتتمناه لكن الحمد لله حاسس إني باتغير للأحسن وجايز في يوم أوصل للمستوى اللي أنا عاوزه..

السؤال الرابع:سبع حاجات دايما بتقولهم؟؟

- باختم جمل كتير بكلمة "..وكده"

- "هيسخطوك يا قرد هيعملوك إيه" باقولها لأي حد خايف من أي حاجه بحس إن معناها إن أي حاجه هتحصل أكيد فيه أوحش منها يعني مش هتبقى أوحش حاجه في الدنيا

- كتير بالاقيني باقول أجزاء من قصيدة "في القدس" بتاعة تميم البرغوثي..بحبها مووت

- ساعات بادعي دعاء كده عامله رنه للموبايل بتاع الشيخ ماهر المعيقلي بيقول"يا إلهنا ويا مولانا ويا سيدنا ، عز جارك وجل ثناؤك وتقدست أسماؤك ، ولا إله غيرك ، يا مجيب الدعوات ، يا قاضي الحاجات ، اللهم يا مقلب القلوب ثبت قلوبنا على دينك ، برحمتك يا جواد يا كريم"

-أي حد اسمه أحمد أو محمد أو محمود لا إرادي كده باقوله "يا ابو حميد"

..كفايه كده مش فاكر حاجه تاني..

السؤال الخامس : سبع مشكلات في حياتك ممكن تحلهم بالفلوس؟؟

بيتهيألي حياتي - والحمد لله - هادئه مستقره ومفيهاش مشاكل كتير وحتى المشاكل اللي فيها - للأسف - متتحلش بالفلوس بس ممكن:

- مشكلة الجواز طبعا محتاج تكاليف كتير

-ومشكلة شرا العربيه البي إم دبليو اللي قلتلكم عليها فوق

-طبعا تجهيز العياده زي ما أنا عاوز

السؤال السادس: سبع أماكن بتحبها؟؟

- البيت :ده أكتر مكان بحبه بجد وقصدي بالبيت أي مكان يكون فيه ماما واخواتي مش مهم فين

- البلد(قريه كده مش ع الخريطه) : بحس براحه غريبه وأنا هناك

- العربيه : ممكن أبات فيها عادي يعني وممكن أسوقها 24 ساعه في اليوم من غير ما أتعب ومش مهم أروح فين والا آجي منين

- أي حته أخرج فيها مع اصحابي اللي بحبهم جدا ومش مهم فين

السؤال السابع: أشخاص بتحبهم غير بابا وماما واخواتي؟؟

- أصحابي: محمد عبد الكريم (صاحب مدونة مطرح ما ترسي دقلها) ومدحت وسامح وخالد وأحمد

- زمايل الظروف مسمحتش إني أقرب منهم رغم إن نفسي أصاحبهم زي محمد الباز ( صاحب مدونة خبيب) ومحمد حسام (صاحب مدونة عيش ندل تموت محروق) وكل اللي اسمهم بيبدأ بحرف الشين في سنه ساته طب..أي شادي وأي شريف..كلهم يتحبوا..

-عيلتي : وأخص بالذكر أعمامي وخالاتي وعاطف ابن خالتي ( أجدع وأكرم واحد شفته في حياتي)

-الأستاذ حسن(مدرس اللغه العربيه) : أشعر بمزيح من الحب والاحترام لهذا الرجل..أدين له بكل ما أعرفه عن اللغه العربيه وبحبي لها وللشعر

السؤال الثامن:مدونين بتحب تقرالهم؟؟

كتير..طبعا اللي في قائمة المدونات في جانب الصفحه وبالذات:

مطرح ما ترسي دقلها : بتعجبني كتاباته جدا ، فيها حاجه كده بتجبرني أقراها ، واستمتع بيها

خبيب: أديب بمعنى الكلمه ، مثقف ، عقليه محترمه جدا ، وأهم حاجه إنه شاعر عملاق وبجد وحشني شعره جدا

أجدع بنوته: طبعا كتابات ولا أروع ، وغنيه عن أي تعريف وأي كلام

فري كيلر : الفصحى الرائعه اللي متعرفش تمسك وراها ولا غلطه

أدهم : بحس إنه عاقل ، واعي ، مثقف ومتزن جدا

على بالي: إحساسها ملوش حل

دكتور بهدوء: شخصيه محترمه جدا وكتاباته جامده جدا

السؤال التاسع: تمرر الواجب لمين؟؟

والله مش عاوز حد يدعي عليا اللي عاوز ياخد الواجب يتفضل بس نفسي أمرره إلى:

خبيب ، مطرح ما ترسي دقلها ، أدهم ، دكتور بهدوء

أخيرا ، باشكر الجوهري على التاج رغم العذاب اللي وراهولي ، بقالي ساعه وربع برد..

دمتم بكل خير

المــعــــضـلـه!!!

2009-01-02T15:31:00.000-08:00

ما تخيلت يوما أنّ شيئا يحدث لي ويدفعني لأن أكتب ما أكتب الآن ، ولم أتصور - طالما أن ذلك الشيء حدث - أني ستواتيني الجرأة لأكتبه وأنشره هكذا على الملأ..

تقول الغالية أمي : " أمر عظيم أن تستطيع - كلما أصابك هم - أن تمسك قلما ، وتخط ما يحزنك ، وتروي للورق همومك ، وتبثه كربك" ، ربما أنا أفعل ذلك الآن ، أو ربما أنني وددت الاعتراف - أخيرا - أن لدي مشكلة ما ، بل يبدو أنني وددت أن أواجه تلك المشكله..

ربما لا أعرف تلك المشكلة تحديدا ، أو ربما أعرفها بمنتهى الدقة وغاية الوضوح ولا أود قول ذلك ، لأنني إن قلت ذلك كان لزاما عليّ أن أجد حلا جذريا - وربما أعرفه - وكان لزاما عليّ أيضا أن أطبق هذا الحل ، وهذا ما لم أستطعه إلى الآن ..

قد يعتقد البعض أنه إذا كانت لديك مشكله ما ، وكنت تعرف جيدا طريقة لحلها ، وكنت تملك كل ما يلزمك لتطبق هذا الحل وتنجح به ، فقد انتهت المشكله ، ولا أرى الأمر بهذه البساطه ، فبيت القصيد أن تملك القدرة لتجمع كل ما تملك لتصنع منه نجاحا ، وإن القدرة لذلك تكمن في ذلك المزيج الفريد من الثقة بالنفس ، والإرادة القوية ، والعزيمة التي تدفعك دفعا لتعمل وتعمل وتعمل ، والإصرار على المواصلة أيا كانت الصعاب ، والصبر على ما تفعل حتى ينجح ، والأمل بأنه يوما ما سينجح ، ثم أضف إلى كل ذلك - أو لا تضف - الإمكانات الازمه والظروف الملائمه..

والأهم من كل ذلك هو ذلك الرابط الذي يربط كل العناصر معا ، ويصوغها في تناغم عجيب لتصبح نجاحا باهرا..إنه الإيمان...الإيمان بالله..ثم بنفسك وقدرتك..

إنها إذا معادلة صعبة جدا ، أو ربما - من وجهة نظر المتكاسلين أمثالي - إنها معضله !!!

شد اللحــــــاف

2008-12-28T15:00:00.000-08:00

شــد اللحـــــــاف

عذرا غزه...لا أملك إلا قلمي وبعض الدعاء

شد اللحاف

ويا بخت من سلم وخاف

ويا بخت من شايف أخوه

راحوا وخدوه

وبيضربوه

وينادي من تحت اللحاف

"يا جماعه ميصحش كده"

"عيب كل ده"

"يلا عشان خاطري سيبوه"

ولا يسمعوه..

هيموتوه

ولسه أخوه تحت اللحاف

طلع دماغه حبتين

وعينه زاغت ع الشمال..

بعد اليمين

ركز أوي جدا وشاف..

جثة أخوه..

وبالعياط حبه اتخنق..

زربن أخينا واتحمق..

صار يجري وكأنه فـ سبق

فجأه وقف..

فكر كده حبه وقال:

"وخروجي من تحت اللحاف..

راح يعمل إيه؟!!!

يا بخت من سلم وخاف!!!"

***

طنش ونام معرفش كام

سمع زعيق..

بعده صريخ..

بعده شوية دربكه..

وحبة كلام..

مكانش عارف..

ده بصحيح والا منام!!

ركز شويه في الكلام

باينه ده صوت المدام

طلع دماغه م اللحاف

ركز أوي جدا وشاف..

اللي كانوا خوّفوه..

اللي يوم قتلوا أخوه..

رجعوا عشان ياخدوا المدام

طأطأ شوية طأطأه!!

ولألأ شوية لألأه!!

وقال : "خلاص هاخرج بأى"

رجع وكحكح كحتين

"دي الدنيا برد حبتين"

"وأصل أنا عندي زكام"

وخروجي يعني هيعمل ايه؟!!!

وإيه حيجرا للمدام؟!!!!

شد اللحاف!!

طنش ونام!!

***

تخــــــــــاريـــــــــــــــف

2008-12-16T15:42:00.000-08:00

تخـــــاريف

(بالعاميه)
----------------------

أنا لامم هنا فـ بيتي حدود الكون

ومن خيبتي منيش فاكر..

"بيتي" فين مكانه يكون!!

ساعات يبقى هنا قريب

ساعات معرفش يبقى ازاي على الأوزون!!!

ساعات بلاقيه كما "الإليزيه"..

وفيه خدام هنا وهناك

والاقيني زي البيه

وأوامري في لحظه تكون!!!

وفجأه يبقى "بيت" بالطين!!

ولا فيه غيري بني آدمين

لو أأمر فيه بإيه ما يكون!!!

ساعات بلاقيني فيه ريس..

طيب..مهو كده كويس

وفجأه فـ لحظه بلاقيني..

بقيت مسجون!!

ساعات تملاه كده فرحه..

طيور سارحه..

ألوف زغاريد!!

وساعه يبقى متستف بكا وشجون!!

وياما فـ "بيتي" أنا حبيت..

صبايا مليحه تملى العين

ودي بيضا..ودي شقرا..ودي سمرا..

ودي مش عارف أنا والله ده إيه اللون!!

تقولي كان عددهم كام؟!!

هاقولك والله مانا فاكر

يجولهم كده بالويم ييجي تلتميت مليون

ساعتها بابقى مش عارف أنا اطلع مين!!

أنا عنتر؟!!

أنا روميو؟!!

أنا المجنون؟!!

وساعه بابقى مش لاقي ولا واحده..

ولا حتى كده صوره وليها عيون!!

وفي مرايه هنا في "البيت"

باشوف فيها واحد غيري!!

وفجأه باكون واحد غيره!!

وغــير الاتنين!!!

ومش عارف ده كله إزاي؟!!!

وييجي منين؟!!!

هل عقلي صبح مجنون؟!!!

والا "بيتي" ده مسكون؟؟؟

***